జిల్లా కలెక్టర్ జితేష్ వి.పాటిల్

బూర్గంపాడు,(విజయక్రాంతి): సేంద్రియ వ్యవసాయ ప్రోత్సాహంపై దృష్టి సారించి రూపొందించిన మోడల్ డెమో ఫామ్ రైతులకు మార్గదర్శకంగా మారాలని జిల్లా కలెక్టర్ జితేష్ వి.పాటిల్ అన్నారు.  మండలంలోని మోరంపల్లి బంజర గ్రామపంచాయతీ పరిధిలోని జింకలగూడెం గ్రామం వద్ద ఏర్పాటుచేసిన మోడల్ డెమో ఫామ్ ను ఆయన సందర్శించారు. ఈ సందర్భంగా కలెక్టర్ మాట్లాడుతూ.. వ్యవసాయ ఆధారిత బహుముఖ ఆదాయ వనరులను గ్రామస్థులకు చేరువ చేయడం లక్ష్యంగా ఈ మోడల్  డెమో ఫామ్ ను రూపొందించినట్లు తెలిపారు. నిరుపయోగ 15 గుంటల భూమిని ఉపయోగించి కూరగాయల సాగు, బంతిపూల పెంపకం, చేపల పెంపకం, కౌజు పిట్టల పెంపకం వంటి పలు విభాగాలను సమగ్ర ప్రదర్శన రూపంలో ఏర్పాటు చేయడం అభినందనీయమని అన్నారు.

కౌజు పిట్టలు మరియు చేపల పెంపకం కొరకు జిల్లా కలెక్టర్ అందించిన నమూనా ఆధారంగా ప్రత్యేక షెడ్‌ను నిర్మించడం పూర్తయ్యిందని అధికారులు కలెక్టర్‌కు వివరించారు.ప్రస్తుతం సొరకాయ, బీరకాయ, కీరదోస పంటలు కోత దశకు చేరుకున్నాయి. అలాగే కాకరకాయ, టమాటా, బంతిపూలు పూత దశలో ఉన్నాయని అధికారులు వివరించారు. నీటి వినియోగం, నేల సారాన్ని పెంచే పద్ధతులు, సేంద్రియ ఎరువుల తయారీ, పురుగుమందుల ప్రత్యామ్నాయ విధానాలపై కూడా మోడల్ ఫామ్ లో ప్రత్యేకంగా ప్రదర్శనలు ఏర్పాటు చేసినట్లు తెలిపారు.మోడల్ ఫామ్ శిక్షణ కేంద్రంగా వినియోగించి రైతులకు, మహిళా సంఘాలకు, యువతకు ప్రత్యక్ష శిక్షణ కార్యక్రమాలు నిర్వహించేలా వ్యవసాయ శాఖ అధికారులు చర్యలు తీసుకోవాలని ఆయన ఆదేశించారు. ఈ కార్యక్రమంలో డిఆర్ డిఓ విద్యా చందన,ఎంపీడీవో జమలారెడ్డి,ఏపీఓ విజయలక్ష్మి,పంచాయతీ సెక్రెటరీ భవాని,ఈజీఎస్ టిఏ స్వాతి,వ్యవసాయ శాఖ అధికారులు,స్వయం సహాయక సంఘాల సభ్యులు,రైతులు పాల్గొన్నారు.