దక్షిణాదిన టాప్ 10 హీరోయిన్ల జాబితాలో స్టార్ బ్యూటీ సమంత ఒకరు. అదంతా ఒకప్పుడు ఈ భామ పేరు ఆ లిస్టులో కనిపించడంలేదు. ఈ విషయాన్ని తానే స్వయంగా ఒప్పుకొందీ ఒప్పులకుప్ప. ఔను, ఇండస్ట్రీలో ప్రస్తుతం తన స్థానం గురించి ఆసక్తికరమైన వ్యాఖ్యలు చేసింది సమంత. తాను ఇప్పుడు టాప్ పొజీషన్‌లో లేనని, తాను నటించిన ఒక్క సినిమా కూడా రూ.వెయ్యి కోట్ల క్లబ్‌లో చేరలేదని, అయినా తాను సంతోషంగానే ఉన్నానని తెలిపింది.

సమంత తాజాగా ఢిల్లీలో జరిగిన ఓ కార్యక్రమంలో పాల్గొంది. ఈ కార్యక్రమంలో ఆమె మాట్లాడుతూ.. “నా జీవితంలో వేటికి ప్రాధాన్యం ఇవ్వాలనేది మయోసైటిస్ తేల్చిచెప్పింది. దాంతో నేను చేసిన పోరాటం నన్ను పూర్తిగా మార్చేసింది. ఒప్పుడు గ్యాప్ లేకుండా సినిమాలు చేయడమే సక్సెస్ అని భావించేదాన్ని. వరుసగా సినిమాలు చేయాలి.. బ్లాక్‌బస్టర్ అందుకోవాలి.. టాప్ 10 హీరోయిన్స్ లిస్టులో ఉండాలి అని..

ఎప్పుడూ ఒకే ఆలోచన ఉండేది. ప్రతి శుక్రవారం నాదే కావాలని భయపడేదాన్ని. నా ఆత్మగౌరవం మొత్తం బాక్సాఫీస్ నంబర్ల చుట్టూనే తిరుగుతూ ఉండేది. కానీ, ఇప్పుడు నా ఆలోచనలు పూర్తిగా మారిపోయాయి. రెండేళ్లుగా సినిమా చేయలేదు.. టాప్ 10 లిస్టులో లేను. అంతేకాదు, నాకు రూ.1000 కోట్ల సినిమాలు కూడా లేవు. అయినా చాలా ఆనందంగా ఉంటున్నా. కొంతకాలంగా నా ఫాలోవర్స్ హెల్త్ పాడ్‌కాస్ట్‌లు చేస్తున్నా.

ఆరోగ్యానికి సంబంధించి ప్రతి సమాచారం అక్కడ దొరుకుతుంది” అని చెప్పుకొచ్చింది. ప్రస్తుతం ఈ కామెంట్స్ నెట్టింట వైరల్‌గా మారాయి. ఇక సమంత సినిమాల విషయానికి వస్తే.. దర్శకద్వయం రాజ్, డీకే తెరకెక్కిస్తున్న ‘రక్త్ బ్రహ్మాండ్: ది బ్లడీ కింగ్‌డమ్’లో నటిస్తోంది. ప్రస్తుతం షూటింగ్ దశలో ఉన్న ఈ చిత్రం త్వరలోనే ప్రేక్షకుల ముందుకు రానుంది.