పాకిస్థాన్ ఘన విజయం

జింబాబ్వేతో రెండో వన్డే

బులవాయో: జింబాబ్వేతో జరుగుతున్న వన్డే సిరీస్‌లో భాగంగా పాకిస్థాన్ బోణీ కొట్టింది. తొలి వన్డేలో అనూహ్య ఓటమి చవిచూసిన పాక్ రెండో వన్డేలో మాత్రం 10 వికెట్ల తేడాతో ఘన విజయాన్ని అందుకుంది. తొలుత బ్యాటింగ్ చేసిన జింబాబ్వే 32.3 ఓవర్లలో 145 పరుగులకు ఆలౌటైంది. జింబాబ్వే బ్యాటర్లలో డియోన్ మైర్స్ (33) టాప్ స్కోరర్.

పాక్ బౌలర్లలో అబ్రర్ అహ్మద్ 4 వికెట్లు, అగా సల్మాన్ 3 వికెట్లు పడగొట్టారు. అనంతరం పాకిస్థాన్ 18.2 ఓవర్లలో వికెట్ నష్టపోకుండా 148 పరుగులు చేసి విజయం సాధించింది. సయీబ్ అయూబ్ (62 బంతుల్లో 113 నాటౌట్) అజేయ శతకంతో మెరవగా.. అబ్దుల్లా షఫీక్ (32 నాటౌట్) అతడికి సహకరించాడు. ఇరుజట్ల మధ్య చివరి వన్డే గురువారం జరగనుంది.