ధనుష్ సరసన..

కోలీవుడ్ స్టార్ హీరో ధనుష్(Kollywood star hero Dhanush) కథానాయకుడిగా ‘డీ56’ అనే వర్కింగ్ టైటిల్‌తో కొత్త సినిమా పూజా కార్యక్రమాలు శుక్రవారం జరిగాయి. ఇటీవలే కోలీవుడ్‌లో ‘లబ్బర్ పందు’ చిత్రంతో సంచలన విజయాన్ని అందుకున్న దర్శకుడు తమిళరసన్ పచ్చముత్తు ఈ సినిమాను తెరకెక్కిస్తున్నారు.

సితార ఎంటర్‌టైన్‌మెంట్స్, ప్రైమ్‌మార్క్ ప్రొడక్షన్స్ సంయుక్తంగా ఈ భారీ పాన్-ఇండియా ప్రాజెక్టును నిర్మిస్తున్నాయి. తాజా పూజా కార్యక్రమాల సందర్భంగా చిత్ర యూనిట్ భారీ తారాగణాన్ని ప్రకటించింది. ఇందులో ధనుష్ సరసన కథానాయికగా ప్రీతి ముకుందన్(Preethi Mukundan) నటిస్తుండగా.. విలక్షణ నటుడు ఎస్‌జే సూర్య, ప్రముఖ హాస్య నటుడు వడివేలు ఈ చిత్రంలో కీలక పాత్రలు పోషిస్తున్నారు. ‘ఉరియడి’ ఫేమ్ విజయ్‌కుమార్ ఈ సినిమాలో ప్రతినాయకుడిగా కనిపించనున్నారు. కోలీవుడ్ మ్యూజిక్ సెన్సేషన్ సాయి అభ్యంకర్ ఈ చిత్రానికి సంగీతాన్ని అందిస్తున్నారు.

పక్కా రూరల్ బ్యాక్‌డ్రాప్ మాస్ అండ్ హై-వోల్టేజ్ కమర్షియల్ యాక్షన్ ఎంటర్‌టైనర్‌గా రూపొందుతోంది. ఇండస్ట్రీ వర్గాల సమాచారం ప్రకారం, ఇది ‘పుష్ప’ తరహాలో సాగే ఊరమాస్ ట్రీట్‌మెంట్‌తో, భారీ యాక్షన్, వయొలెన్స్ ఎలిమెంట్స్‌తో కూడిన పవర్‌ఫుల్ స్క్రిప్టుతో రాబోతోంది. ఈ చిత్రాన్ని 2027 వేసవి కానుకగా విడుదల చేయడానికి మేకర్స్ ప్లాన్ చేస్తున్నారు. ఇదిలావుండగా, ప్రీతి ముకుందన్.. స్టార్ హీరో ధనుష్ సరసన నటించే ఛాన్స్ దక్కించుకోవడంతో యంగ్ హీరోయిన్ పేరు ప్రస్తుతం సోషల్ మీడియాలో మారుమోగిపోతోంది. ఈ కాంబినేన్‌పై ఇటు ధనుష్ అభిమానుల్లో, అటు సినిమా వర్గాల్లో భారీ అంచనాలు నెలకొన్నాయి.