ఐపీఎల్ 2025 ప్రదర్శన కొన్ని గంటల్లో ప్రారంభం కానుంది. ప్రారంభ మ్యాచ్ కోల్‌కతాలోని ఈడెన్ గార్డెన్స్‌లో జరుగుతుంది. ఇందులో డిఫెండింగ్ ఛాంపియన్స్ కోల్‌కతా నైట్ రైడర్స్ (కెకెఆర్) రాయల్ ఛాలెంజర్స్ బెంగళూరు (ఆర్‌సిబి)తో (KKR vs RCB IPL 2025)తలపడుతుంది. షెడ్యూల్ ప్రకారం, టాస్ సాయంత్రం 7:00 గంటలకు జరగాల్సి ఉంది. మ్యాచ్ రాత్రి 7:30 గంటలకు ప్రారంభం కానుంది.

అయితే, ప్రస్తుతం ఈడెన్ గార్డెన్స్‌(Eden Gardens)పై చీకటి మేఘాలు కమ్ముకుంటున్నాయి. అప్పుడప్పుడు తేలికపాటి చినుకులు కురుస్తున్నట్లు నివేదించబడింది. మ్యాచ్ సమయంలో వర్షం పడే అవకాశం ఉందని భారత వాతావరణ శాఖ (ఐఎండీ) అంచనా వేసింది. గురువారం నుండి ఆదివారం వరకు దక్షిణ బెంగాల్ అంతటా ఉరుములు, మెరుపులతో కూడిన వర్షాలు కురుస్తాయని ఐఎండీ అంచనా వేసింది. ముందు జాగ్రత్త చర్యగా, ఐఎండీ ఈరోజు ఆరెంజ్ అలర్ట్, ఆదివారం యెల్లో అలర్ట్ జారీ చేసింది. ఈ అంచనా అభిమానులను నిరాశపరిచింది. మ్యాచ్‌కు అంతరాయాలు కలిగే అవకాశం ఉందనే ఆందోళనలు పెరుగుతున్నాయి. అదనంగా, వర్షం కారణంగా ప్రారంభ వేడుక రద్దు చేయబడవచ్చని నివేదికలు సూచిస్తున్నాయి.