రెడ్డిపల్లి కార్బన్ రిసోర్సస్ సంస్థ వివాదం – హైకోర్టు ఆదేశాలు, అధికారుల అడ్డంకులు

చేగుంట,(విజయక్రాంతి): మెదక్ జిల్లా, చేగుంట మండల పరిధిలోని రెడ్డిపల్లి గ్రామ శివారులో ఉన్న కార్బన్ రిసోర్సస్ ప్రైవేట్ లిమిటెడ్ సంస్థకు సంబంధించిన వివాదం తాజాగా వెలుగులోకి వచ్చింది. రాష్ట్ర విద్యుత్ సంస్థకు సుమారు రూ.20 కోట్ల బకాయిలు ఉన్న ఈ కంపెనీ, ఆర్థిక ఇబ్బందులతో కార్యకలాపాలు నిలిచిపోవడంతో హైకోర్టును ఆశ్రయించింది. కంపెనీ యజమాని కౌశిక్ గోష్ ఆధ్వర్యంలో హైకోర్టులో ప్రత్యేక పిటిషన్ దాఖలు చేయగా, ఈ ఏడాది మార్చి 31, 2026న హైకోర్టు కీలక తీర్పు వెలువరించింది. ఆ తీర్పు ప్రకారం, రూ.7 కోట్లను బ్యాంక్ గ్యారంటీ రూపంలో సమర్పించి సెటిల్మెంట్ చేసుకునేందుకు కంపెనీకి అనుమతి ఇచ్చింది.

దీంతో సంస్థ మళ్లీ తన ఆర్థిక వ్యవహారాలను సర్దుబాటు చేసుకునే దిశగా చర్యలు ప్రారంభించింది. ఈ క్రమంలో కంపెనీ ప్రాంగణంలో ఉన్న ముడి సరుకులను తరలించే ప్రక్రియను యాజమాన్యం ప్రారంభించింది. అయితే, రామయంపేట్ ఏ.డి. ఆదయ్య స్పందిస్తూ, తమకు సంబంధిత ఉన్నతాధికారుల నుంచి ఎలాంటి అధికారిక ఆదేశాలు అందలేదని పేర్కొన్నారు. సరైన అనుమతులు లేకుండానే ముడి సరుకులను తరలిస్తున్నారనే అనుమానంతో, వాటి తరలింపును తాత్కాలికంగా అడ్డుకున్నామని తెలిపారు. దీనిపై కంపెనీ యజమాని కౌశిక్ గోష్ తీవ్రంగా స్పందిస్తూ, హైకోర్టు ఆదేశాల మేరకే తాము సరుకులను తరలిస్తున్నామని స్పష్టం చేశారు.

చట్టబద్ధంగా అనుమతులు పొందిన తరువాత కూడా అధికారుల అడ్డంకులు సృష్టించడం చట్టవిరుద్ధమని ఆయన పేర్కొన్నారు. తమకు న్యాయపరమైన హక్కులు ఉన్నాయని, వాటిని అడ్డుకోవడం అనవసర వివాదాలకు దారితీస్తుందని అన్నారు. ఈ ఘటనతో అక్కడ కొంత ఉద్రిక్త పరిస్థితులు నెలకొన్నాయి. విషయం తెలుసుకున్న చేగుంట పోలీస్ స్టేషన్ ఎస్సై చైతన్యకుమార్ రెడ్డి తక్షణమే సంఘటనా స్థలానికి చేరుకుని ఇరు వర్గాలతో చర్చలు జరిపారు. ఎలాంటి ఘర్షణలు చోటుచేసుకోకుండా పరిస్థితిని అదుపులోకి తీసుకొచ్చారు.ప్రస్తుతం ఈ వ్యవహారం పరిపాలనా, న్యాయ పరంగా మరింత పరిశీలనలో ఉండగా, హైకోర్టు ఆదేశాల అమలు, స్థానిక అధికారుల పాత్రపై స్పష్టత అవసరమని స్థానికులు భావిస్తున్నారు. కంపెనీ, అధికారులు పరస్పరం సమన్వయం చేసుకుంటే సమస్య పరిష్కారం దిశగా ముందుకు సాగే అవకాశాలు ఉన్నాయని అభిప్రాయాలు వ్యక్తమవుతున్నాయి.