విద్యారంగ సమస్యల పరిష్కారం కోసం విద్యాసంస్థలు బంద్

షాద్‌నగర్‌లో కేజీ నుంచి పీజీ వరకు విద్యాసంస్థల బంద్

షాద్ నగర్,(విజయక్రాంతి): రాష్ట్రవ్యాప్తంగా వామపక్ష విద్యార్థి సంఘాల పిలుపు మేరకు శుక్రవారం నిర్వహించిన కేజీ నుంచి పీజీ వరకు విద్యాసంస్థల బంద్ షాద్‌నగర్ నియోజకవర్గంలో విజయవంతంగా జరిగింది. అఖిల భారత విద్యార్థి సమాఖ్య, భారత విద్యార్థి సమాఖ్య ఆధ్వర్యంలో బంద్ కార్యక్రమం నిర్వహించి విద్యారంగ సమస్యలను వెంటనే పరిష్కరించాలని ప్రభుత్వాన్ని డిమాండ్ చేశారు. భారత విద్యార్థి సమాఖ్య షాద్‌నగర్ డివిజన్ కార్యదర్శి శ్రీకాంత్, అఖిల భారత విద్యార్థి సమాఖ్య నాయకుడు ఆకాష్ నాయక్ ఆధ్వర్యంలో జరిగిన కార్యక్రమంలో అఖిల భారత విద్యార్థి సమాఖ్య రంగారెడ్డి జిల్లా అధ్యక్షుడు ఎం. పవన్ చౌహాన్, భారత విద్యార్థి సమాఖ్య జిల్లా ఉపాధ్యక్షుడు వడ్ల శ్రీకాంత్ మాట్లాడుతూ రాష్ట్రంలో విద్యారంగం తీవ్ర సమస్యలను ఎదుర్కొంటోందన్నారు.

ప్రభుత్వ పాఠశాలల విలీన ప్రతిపాదనను విరమించుకోవాలని, విద్యాశాఖకు ప్రత్యేక మంత్రిని నియమించాలని, ఖాళీగా ఉన్న ఉపాధ్యాయులు, మండల విద్యాధికారులు, జిల్లా విద్యాధికారులు, అధ్యాపకుల పోస్టులను వెంటనే భర్తీ చేయాలని కోరారు. మధ్యాహ్న భోజన పథకానికి నిధులు పెంచి మహిళా సంఘాల ద్వారా అమలు చేయాలని, పెరిగిన ధరలకు అనుగుణంగా వసతి, ఇతర నిర్వహణ చార్జీలను పెంచి పెండింగ్ బిల్లులను విడుదల చేయాలని డిమాండ్ చేశారు.

అలాగే ఉత్తమ అందుబాటు పథకానికి నిధులు విడుదల చేయాలని, జాతీయ విద్యా విధానం–2020ను తెలంగాణలో అమలు చేయవద్దని అసెంబ్లీలో తీర్మానం చేయాలని, విద్యార్థి సంఘాల ఎన్నికలు నిర్వహించాలని, ప్రైవేట్ విద్యాసంస్థల ఫీజులను నియంత్రించాలని కోరారు. ఈ కార్యక్రమంలో అఖిల భారత విద్యార్థి సమాఖ్య జిల్లా నాయకుడు శివకుమార్, శ్రీను తదితరులు పాల్గొన్నారు.