గుండె లయపై స్మార్ట్‌వాచ్ హెచ్చరిక

‘మీ గుండె స్పందన సక్రమంగా లేదు‘ అని స్మార్ట్‌వాచ్ హెచ్చరిస్తే దానిని తేలిగ్గా తీసుకోవద్దని డాక్టర్ రామకృష్ణ ఎస్‌వీకే (క్లినికల్ డైరెక్టర్ కార్డియాక్ ఎలక్ట్రోఫిజియాలజీ, కేర్ ఆస్పత్రి, బంజారహిల్స్) హెచ్చరిస్తున్నారు. చాలామంది దీనిని పరికరం లోపం, ఒత్తిడి లేదా నిద్రలేమి కారణంగా వచ్చి ఉండొచ్చని భావించి నిర్లక్ష్యం చేస్తారని చెప్పారు. ఇటీవలి కాలంలో ఇలాంటి హెచ్చరికలతో వైద్యులను సంప్రదిస్తున్న వారి సంఖ్య పెరుగుతోందని, అనేక మందిలో ముందుగా గుర్తించని గుండె లయ లోపాలు బయటపడుతున్నాయని ఆయన చెపుతున్నారు. జూన్ 1 నుంచి 7 వరకు నిర్వహిస్తున్న ప్రపంచ హార్ట్ రిథమ్ వీక్ సందర్భంగా ప్రజలకు అవగాహన కల్పిస్తున్నారు. 

స్మార్ట్‌వాచ్ లేదా ఫిట్‌నెస్ ట్రాకర్లలో అసాధారణ గుండె స్పందనలకు సంబంధించిన హెచ్చరిక వచ్చిన తర్వాత వైద్యులను సంప్రదిస్తున్న రోగుల సంఖ్య పెరుగుతోంది. అనేక సందర్భాల్లో ఈ సాధారణ నోటిఫికేషన్లే ముందుగా గుర్తించని గుండె లయ లోపాలను వెలికితీసి, స్ట్రోక్, గుండె వైఫల్యం, ఆకస్మిక గుండె ఆగిపోవడం వంటి తీవ్రమైన సమస్యలను నివారించడంలో సహాయపడుతున్నాయి.

గుండె దడ, వేగంగా గుండె కొట్టుకోవడం, తల తిరగడం, కారణం లేకుండా అలసట, శ్వాస తీసుకోవడంలో ఇబ్బంది లేదా స్మార్ట్వాచ్లో అసాధారణ గుండె స్పందనలకు సంబంధించిన హెచ్చరికలు వచ్చినప్పుడు వాటిని నిర్లక్ష్యం చేయ వద్దు. ప్రతి అలర్ట్ తీవ్రమైన సమస్యకు సంకేతం కాకపోయినా, సరైన సమయంలో పరీక్షలు చేయించుకోవడం వల్ల అత్యవసర పరిస్థితులను నివారించవచ్చు.

ప్రపంచ హార్ట్ రిథమ్ వీక్ 

ప్రపంచ హార్ట్ రిథమ్ వీక్ అనేది గుండె లయ లోపాలపై అవగాహన పెంచడం, ముందస్తు నిర్ధారణ, సరైన చికిత్సను ప్రోత్సహించడం కోసం అరిత్మియా అలయన్స్ నిర్వహించే అంతర్జాతీయ కార్యక్రమం. ఈ ఏడాది థీమ్ ‘మీ గుండె మీ స్పందన మీ జీవన కథ’ కాగా, గుండె లయలో వచ్చే మార్పులను ముందుగానే గుర్తించి సరైన సమయంలో వైద్య సలహా తీసుకోవాల్సిన అవసరాన్ని ఇది తెలియజేస్తోంది. గుండె లయ లోపాల్లో అత్యంత సాధారణమైన ‘ఏట్రియల్ ఫైబ్రిలేషన్ ‘లో గుండె స్పంద న క్రమబద్ధంగా ఉండదు.

ప్రపంచవ్యాప్తంగా 6 కోట్ల మందికిపైగా ఈ సమస్యతో బాధపడుతున్నారు. సరైన చికిత్స లేకపోతే స్ట్రోక్ ప్రమాదం ఐదు రెట్లు పెరిగే అవకా శం ఉందని హెచ్చరిస్తున్నారు. గుండె లయ లోపాలు కేవలం వృద్ధులకే పరిమితం కావడం లేదని చెపుతున్నా రు. పెరుగుతున్న ఒత్తిడి, శారీరక శ్రమ తగ్గిపోవడం, రక్తపోటు, మధుమేహం, ఊబకాయం, నిద్ర సమస్యలు, ఇత ర గుండె సంబంధిత ప్రమాద కారకాలు యువతలోనూ, మధ్య వయసు వారిలోనూ ఈ సమస్యలు పెరగడానికి కారణమవుతున్నాయి. కొందరిలో మొదటి హెచ్చరికే స్ట్రోక్, స్పృహ కోల్పోవడం లేదా ఆకస్మిక గుండె ఆగిపోవడం రూపంలో కనిపిస్తుంది.

ఐటీ ఉద్యోగి నిర్లక్ష్యం

ఇటీవల కేర్ హాస్పిటల్స్‌లో 42 ఏళ్ల ఐటీ ఉద్యోగి చికిత్స పొందారు. ఆయనకు కొన్ని నెలలుగా గుండె వేగంగా కొట్టుకోవడం, తల తిరగడం, ఛాతీలో కంపిస్తున్నట్లు అనిపించడం వంటి లక్షణాలు కనిపించినప్పటికీ వాటిని ఉద్యోగ ఒత్తిడి, నిద్రలేమి కారణంగా భావించి నిర్లక్ష్యం చేశారు. తర్వాత ఒక్కసారిగా ఇంట్లోనే స్పృహ తప్పి పడిపోవడంతో ఆసుపత్రికి తరలించారు. పరీక్షల్లో తీవ్రమైన గుండె లయ లోపం ఉన్నట్లు గుర్తించి ప్రత్యేక ఎలక్ట్రోఫిజియాలజీ చికిత్స అందించారు.

సమయానికి చికిత్స అందడంతో ఆయన పూర్తిగా కోలుకున్నారు. స్మార్ట్‌వాచ్‌లు వైద్య నిర్ధారణ పరికరాలు కాకపోయినా, ప్రారంభ స్థాయి స్క్రీనింగ్‌లో ఉపయోగకరంగా మారుతున్నాయి. అనేక సందర్భాల్లో ఈ పరికరాల ద్వారా వచ్చిన అలర్ట్లు ముందుగా గుర్తించని ఏట్రియల్ ఫైబ్రిలేషన్ సహా పలు గుండె లయ లోపాలను గుర్తించడంలో సహాయపడుతున్నాయి.

గుండె లయ సమస్యలు

‘గుండె లయ లోపాలు చాలా మందికి తెలియకుండానే ఉండే సాధారణ సమస్యలు. అసమాన గుండె స్పందన, తల తిరగడం, స్పృహ కోల్పోవడం, కారణం లేకుండా అలసట లేదా శ్వాస తీసుకోవడం లో ఇబ్బంది వంటి లక్షణాలను ఎప్పుడూ నిర్లక్ష్యం చేయకూడదు అని రామకృష్ణ ఎస్.వి.కె అన్నారు. ముందస్తు నిర్ధారణతో చాలా అరిత్మియాలను సమర్థవంతంగా నియంత్రించవచ్చు లేదా పూర్తిగా నయం చేయవచ్చు. ఇటీవల స్మార్ట్వాచ్లలో వచ్చే అసాధారణ గుండె స్పందన హెచ్చరికల కారణంగా వైద్యులను సంప్రదించే వారి సంఖ్య పెరుగుతోంది.

సాంకేతికతతో గుండె లయ లోపాలను ఖచ్చితంగా నిర్ధారించి సూక్ష్మ చికిత్సల ద్వారా సమర్థవంతంగా నిర్వహించగలుగుతున్నాం‘ అని తెలిపారు. సరైన సమయంలో పరీక్షలు చేయించుకోవడం ద్వారా తీవ్రమైన గుండె లయ లోపాలను ముందుగానే గుర్తించి, వాటి వల్ల వచ్చే సంక్లిష్టతల ప్రమాదాన్ని గణనీయంగా తగ్గించవచ్చని ఆయన తెలిపారు.