బాలీవుడ్ సీనియర్ నటుడు జాకీ ష్రాఫ్ ప్రధాన పాత్రలో నటిస్తున్న కొత్త సినిమా ‘ది గ్రేట్ గ్రాండ్ సూపర్ హీరో: ఏలియన్స్ కా ఆగమన్’. జీ స్టూడియోస్ సమర్పణలో మనీష్ సైనీ దర్శకత్వంలో తెరకెక్కుతున్న ఈ చిత్రం సరికొత్త ఫాంటసీ కామెడీ డ్రామాగా రూపుదిద్దుకుంటోంది. ఇందులో ప్రతీక్ బబ్బర్, భాగ్యశ్రీ, శరత్ సక్సేనా, సాహర్ష్ శుక్లా తదితరులు కీలక పాత్రలు పోషిస్తున్నారు. ఇదే ఏడాది వేసవి కానుకగా విడుదల కానుందీ చిత్రం.

తాజాగా చిత్రబృందం ఈ మూవీ ఫస్ట్‌లుక్ టీజర్‌ను విడుదల చేసింది. ఒక పాఠశాల విద్యార్థి తన కుటుంబ రహస్యం గురించి స్నేహితుడితో చెప్పడంతో టీజర్ ప్రారంభమవుతుంది. తన తాతయ్యకు అద్భుత శక్తులు ఉన్నాయని,  ఆ విషయం బయటపడితే తాతయ్య శక్తులు కోల్పోవడమే కాకుండా, భూమిపై ఏలియన్స్ దాడి చేసే అవకాశం ఉందని ఆ బాలుడు భయపడతాడు. ఇక టీజర్ చివరలో జాకీ ష్రాఫ్ సూపర్ హీరో కాస్ట్యూమ్‌లో మెరిసి ఆశ్చర్యపరిచారు. 1985లో వచ్చిన ‘శివ కా ఇన్సాఫ్’లో ఆయన సూపర్ హీరో పాత్రలో కనిపించారు. దాదాపు 40 ఏళ్ల తర్వాత ఇప్పుడు మళ్లీ ఆ పాత్రలో అలరించనున్నారు.