పేదల సంక్షేమమే ప్రభుత్వ లక్ష్యం

మహబూబాబాద్, ఏప్రిల్ 12 (విజయక్రాంతి): నిలువ నీడలేని పేదలకు పక్కా ఇల్లు కట్టించి, పేదలకు అండగా కాంగ్రెస్ ప్రజా ప్రభుత్వం నిలుస్తోందని మహబూబాబాద్ ఎమ్మెల్యే డాక్టర్ భూక్యా మురళి నాయక్ అన్నారు. ఆమనగల్ బలరాం నాయక్ తండ గ్రామపంచాయతీ పరిధిలో లబ్ధిదారులకు మంజూరు చేసిన ఇందిరమ్మ ఇండ్ల నిర్మాణం పూర్తయిన సందర్భంగా ఆదివారం గృహప్రవేశ కార్యక్రమాన్ని నిర్వహించారు. 

నూతనంగా నిర్మించిన ఇందిరమ్మ గృహాలను ఎమ్మెల్యే, డిసిసి అధ్యక్షురాలు డాక్టర్ ఉమతో కలిసి ప్రారంభించారు. ఈ సందర్భంగా ఎమ్మెల్యే మాట్లాడుతూ నిలువ నీడలేని నిరుపేదలకు తమకున్న స్థలంలో ఇందిరమ్మ ఇల్లు నిర్మించుకోవడానికి 5 లక్షలు మంజూరు చేసి, నివాస గృహాలను నిర్మించి ఇస్తున్నామన్నారు. పేద కుటుంబాలు, ముఖ్యంగా దళితులు, గిరిజనులు, వికలాంగులు, భూమిలేని వ్యక్తులకు విడతల వారిగా మంజూరు చేస్తామని, ప్రజా ప్రభుత్వంలో ప్రతి పేదవాడు ఇందిరమ్మ ఇళ్లు నిర్మించుకునే విధంగా కృషి చేస్తానన్నారు.