కెనడా విక్రయించే విమానాలపై 50 శాతం సుంకం విధిస్తామని వార్నింగ్ 

అమెరికా జెట్లకు అనుమతి నిరాకరించడమే కారణమని వెల్లడి

ప్రధాని మార్క్ కార్నీతో పెరుగుతున్న విభేదాల నేపథ్యంలో కొత్త హెచ్చరిక 

వాషింగ్టన్, జనవరి 30 : అగ్రరాజ్యం అమెరికా అధ్యక్షుడు డొనాల్ ట్రంప్ తన పొరుగు దేశమైన కెనడాపై వాణిజ్య యుద్ధాన్ని మరింత తీవ్రతరం చేశారు. కెనడా నుంచి అమెరికాకు విక్రయించే అన్ని రకాల విమానాలపై ఏకంగా 50 శాతం సుంకాలు విధిస్తానని తాజాగా సం చలన హెచ్చరిక జారీ చేశారు. కెనడా ప్రధాని మార్క్ కార్నీతో ట్రంప్‌కు ఉన్న విభేదాలు ఇప్పుడు రెండు దేశాల మధ్య ఆర్థిక సంబంధాలను ప్రమాదంలో నెట్టేస్తున్నాయి. అమెరి కాకు చెందిన ’గల్ఫ్‌‌‌రరస్టీమ్ ఏరోస్పేస్’ తయారు చేసిన జెట్ విమానాలకు కెనడా అనుమతి ఇవ్వడానికి నిరాకరిస్తోందని.. దానికి ప్రతీకారంగానే తాను ఈ నిర్ణయం తీసుకున్నట్లు ట్రం ప్ సోషల్ మీడియా వేదికగా ప్రకటించారు.

కెనడా గనుక వెంటనే తన వైఖరిని మార్చుకోకపోతే.. ఆ దేశానికి చెందిన అతిపెద్ద విమాన తయారీ సంస్థ ‘బొంబార్డియర్’ సహా అన్ని విమానాలపై భారీ పన్నులు విధిస్తానని స్పష్టం చేశారు. అంతేకాకుండా కెనడా విమానాలకు ఉన్న గుర్తింపును కూడా రద్దు చేస్తానని బెదిరించారు. గత వారాంతంలోనే కెనడాపై ట్రం ప్ మరో భారీ హెచ్చరిక చేశారు. చైనాతో కెనడా కుదుర్చుకోబోతున్న వాణిజ్య ఒప్పందంపై ఆయన తీవ్ర అసహనం వ్యక్తం చేస్తూ.. ఒకవేళ కెనడా చైనాతో ముందుకు వెళ్తే, ఆ దేశం నుంచి అమెరికాకు వచ్చే అన్ని వస్తువులపై 100 శాతం సుంకాలు విధిస్తానని హెచ్చరించారు.  అయితే కెనడా ఇప్పటికే ఒక ఒప్పందానికి వచ్చినట్లు సమాచారం ఉన్నప్పటికీ.. సుంకాలు ఎప్పటి నుంచి అమలులోకి వస్తాయనే దానిపై ట్రంప్ స్పష్టత ఇవ్వలేదు. 

అధికారికంగా స్పందించలేదు..

అయితే ట్రంప్ చేసిన ఈ ఘాటు వ్యాఖ్యలపై కెనడా ప్రభుత్వం కానీ, విమాన తయారీ దిగ్గజం బొంబార్డియర్ కానీ ఇప్పటి వరకు అధికారికంగా స్పందించలేదు. కెనడా రవాణా మంత్రిత్వ శాఖ ప్రతినిధులు కూడా ఈ విషయంలో మౌనం వహిస్తున్నారు. మరోవైపు ట్రంప్ అనుసరిస్తున్న ఈ ’అమెరికా ఫస్ట్’ విధానం వల్ల ఉత్తర అమెరికా దేశాల మధ్య ఉన్న పాత వాణిజ్య ఒప్పందాలు దెబ్బతినే అవకాశం ఉందని ఆర్థిక నిపుణులు ఆందోళన వ్యక్తం చేస్తున్నారు. విమానాలపై 50 శాతం పన్ను విధిస్తే కెనడా ఏవియేషన్ పరిశ్రమ భారీగా నష్టపోతుంది. వేలాది మంది ఉద్యోగులపై దీని ప్రభావం పడటమే కాకుండా.. అంతర్జాతీయ విమాన మార్కెట్లో ధరల హెచ్చుతగ్గులకు కూడా ఇది దారి తీస్తుంది.