ప్రేమ విఫలం.. యూట్యూబర్ కోమలి ఆత్మహత్య

హైదరాబాద్: మణికొండ చిత్రపురి కాలనీలో(Chitrapuri Colony) బుధవారం విషాదం చోటుచేసుకుంది. తన నివాసంలో 21 ఏళ్ల యూట్యూబర్ కోమలి(YouTuber Komali) ఆత్మహత్య చేసుకుంది. రాయదుర్గం ఇన్‌స్పెక్టర్ వెంకన్న తెలిపిన వివరాల ప్రకారం.. విశాఖపట్నంకు చెందిన కోమలి హైదరాబాద్‌లో బీఎస్సీ డిగ్రీ చదువుతోంది. మణికొండలోని చిత్రపురి కాలనీలో బంధువుల వద్ద ఉంటోంది. విశాఖపట్నంకు చెందిన సాఫ్ట్‌వేర్ ఇంజనీర్, మరో యూట్యూబర్ అయిన నిఖిల్ రెడ్డితో మూడేళ్లుగా కోమలి ప్రేమలో ఉందని పోలీసులు తెలిపారు.

నిఖిల్ ఆమెను దూరం పెట్టాడు.  బ్రేకప్ బాధతో ఆమె తీవ్ర మనస్థాపం చెందింది.  దాదాపు ఆరు నెలల క్రితమే కోమలి ఓసారి ఆత్మహత్యకు ప్రయత్నించింది. కానీ ఆమె బంధువులు జోక్యం చేసుకుని ఆమెకు కౌన్సెలింగ్ ఇచ్చారు. ఇటీవల, ఈ జంటకు వివాహం విషయంలో వివాదం తలెత్తిందని తెలుస్తోంది. సోమవారం ఇంట్లో ఎవరూ లేని సమయంలో కోమలి చీరతో ఉరి వేసుకుని ప్రాణాలు తీసుకుంది. యూట్యూబ్ వీడియోలు చేస్తూ కోమలి యూట్యూబర్ గా మంచి గుర్తింపు తెచ్చుకుంది. ఆమె తల్లి మంగళవారం రాయదుర్గం పోలీసులకు ఫిర్యాదు చేయడంతో ఈ సంఘటన వెలుగులోకి వచ్చింది. కేసు నమోదు చేసిన పోలీసులు తదుపరి దర్యాప్తు చేస్తున్నారు.