రైస్ మిల్లర్లకు కంటిమీద కునుకు లేకుండా చేస్తున్న సీఐడీ విచారణ!
- సన్నబియ్యం పేరుతో దొడ్డు బియ్యం సరఫరా చేసిన కుంభకోణం
- వెలుగులోకి వస్తున్న కొత్త పేర్లు.. మరో 30 మంది మిల్లర్లపై అనుమానాలు!
- సుమారు 80 మంది పరారీలో ఉన్నట్లు ప్రచారం.. ఇప్పటికే ఐదుగురు మిల్లర్లతో పాటు అధికారి అరెస్ట్
బోధన్, నవంబర్ 05 (విజయ క్రాంతి): సన్నబియ్యం సరఫరా(Supply of fine-quality rice) చేయాల్సిన చోట దొడ్డు బియ్యం సరఫరా చేసి ప్రభుత్వాన్ని మోసం చేసినట్లు ఆరోపణలు ఎదుర్కొంటున్న రైస్ మిల్లర్ల(Rice millers) వ్యవహారం జిల్లాలో కలకలం రేపుతోంది.
ఫుడ్ కార్పొరేషన్ ఆఫ్ ఇండియా (ఎఫ్‌సీఐ)కి బియ్యం సరఫరా చేసిన వ్యవహారంలో సీఐడీ అధికారులు దర్యాప్తును ముమ్మరం చేయడంతో రైస్ మిల్లుల యజమానుల్లో ఆందోళన మొదలైంది. ఇప్పటికే పలువురు మిల్లర్లు, సంబంధిత అధికారులపై చర్యలు చేపట్టిన సీఐడీ.. తాజాగా మరికొన్ని కీలక వివరాలను సేకరిస్తున్నట్లు సమాచారం. ఈ కేసులో మరికొందరు బడా మిల్లర్ల పేర్లు కూడా వెలుగులోకి వస్తున్నట్లు తెలుస్తోంది.
రూ.10.42 కోట్ల కుంభకోణం!
నిజామాబాద్ జిల్లాలోని ఎనిమిది రైస్ మిల్లుల్లో సీఐడీ అధికారులు తనిఖీలు నిర్వహించి, సన్నబియ్యానికి బదులుగా దొడ్డు బియ్యం సరఫరా చేసిన వ్యవహారంపై కేసులు నమోదు చేశారు. ఈ క్రమంలో జిల్లా పౌరసరఫరాల శాఖకు చెందిన అధికారితో పాటు ఐదుగురు రైస్ మిల్లర్లను అరెస్టు చేసినట్లు సమాచారం. ఇతర రాష్ట్రాల్లో కొనుగోలు చేసిన దొడ్డు బియ్యాన్ని ప్రభుత్వానికి సరఫరా చేసినట్లు ప్రాథమిక విచారణలో గుర్తించినట్లు తెలుస్తోంది.
ఈ వ్యవహారంలో సుమారు రూ.10.42 కోట్ల మేర అక్రమాలు జరిగినట్లు ప్రాథమికంగా అంచనా వేస్తున్నారు. రైస్ మిల్లుల తనిఖీల్లో అధికారుల నిర్లక్ష్యం, కస్టమ్ మిల్లింగ్ రైస్ (సీఎంఆర్) బకాయిలు, పీడీఎస్ బియ్యం పక్కదారి పట్టిన వ్యవహారాలు సైతం విచారణలో ప్రస్తావనకు వస్తున్నాయి. అయితే ప్రధానంగా సన్నబియ్యం పేరుతో దొడ్డు బియ్యం సరఫరా చేసిన అంశంపైనే సీఐడీ దర్యాప్తు కొనసాగుతోంది.
మరో 30 మంది మిల్లర్లపై దృష్టి!
ప్రారంభంలో ఎనిమిది రైస్ మిల్లుల్లో తనిఖీలు చేపట్టిన సీఐడీ అధికారులు, తాజాగా మరో 30 మంది వరకు రైస్ మిల్లర్ల వివరాలను పరిశీలిస్తున్నట్లు సమాచారం. వీరిలో కొందరు ప్రముఖ, బడా మిల్లర్లు కూడా ఉన్నట్లు ప్రచారం జరుగుతోంది. రైస్ మిల్లర్ల సంఘానికి చెందిన ఓ కీలక వ్యక్తి సైతం సుమారు రూ.5 కోట్ల విలువైన సన్నబియ్యం సరఫరాకు బదులుగా దొడ్డు బియ్యం సరఫరా చేసినట్లు ఆరోపణలు వినిపిస్తున్నాయి. ఈ వ్యవహారంపై అధికారులు మరింత లోతుగా విచారణ జరుపుతున్నట్లు తెలుస్తోంది.
మామూళ్లు.. వసూళ్లు.. పంపకాల ఆరోపణలు!
జిల్లాలో రైస్ మిల్లుల నిర్వహణ, ధాన్యం సేకరణ, సీఎంఆర్ సరఫరా వ్యవహారాల్లో భారీగా మామూళ్లు చేతులు మారుతున్నాయనే ఆరోపణలు వినిపిస్తున్నాయి. సంబంధిత శాఖల అధికారులు, కొందరు ప్రజాప్రతినిధులకు ముడుపులు అందజేస్తూ అక్రమాలకు పాల్పడ్డారనే విమర్శలు ఉన్నాయి. జిల్లాలో సుమారు 410 రైస్ మిల్లులు ఉండగా, వీటిలో దాదాపు 70 వరకు బాయిల్డ్ రైస్ మిల్లులు ఉన్నట్లు సమాచారం.
కొత్తగా రైస్ మిల్లు ఏర్పాటు చేయాలంటే అసోసియేషన్‌కు రూ.3 లక్షలు చెల్లించాల్సి ఉంటుందని, ధాన్యం సేకరణకు సంబంధించి ప్రతి క్వింటాలుకు రూ.3 చొప్పున వసూలు చేస్తున్నారనే ఆరోపణలు ఉన్నాయి. ఈ వసూళ్ల ద్వారా ఏటా కోట్లాది రూపాయలు సమకూరుతున్నట్లు ప్రచారం జరుగుతోంది. అయితే ఈ మొత్తాల వసూళ్లు, పంపకాల ఆరోపణలపై అధికారికంగా నిర్ధారణ కావాల్సి ఉంది.
మరోవైపు పీడీఎస్ బియ్యం అక్రమ రవాణా వ్యవహారంలోనూ సంబంధిత శాఖ అధికారుల పాత్రపై అనుమానాలు వ్యక్తమవుతున్నాయి. జిల్లా కేంద్రానికి చెందిన రెండు ముఠాలు ఈ అక్రమ రవాణాలో కీలకంగా వ్యవహరిస్తున్నట్లు సమాచారం. ఈ అంశాలన్నీ సీఐడీ విచారణలో భాగంగా పరిశీలనకు వచ్చే అవకాశముంది.
ఈనెల 12 వరకు అరెస్టులపై ఊరట!
సన్నబియ్యం సరఫరా వ్యవహారంలో సీఐడీ విచారణ కొనసాగుతున్న నేపథ్యంలో కొందరు రైస్ మిల్లుల యజమానులు ముందస్తు అరెస్టుల నుంచి రక్షణ కోరుతూ హైకోర్టును ఆశ్రయించినట్లు తెలుస్తోంది. ఈ క్రమంలో ఈనెల 12వ తేదీ వరకు వారిని అరెస్టు చేయవద్దని కోర్టు ఆదేశించినట్లు సమాచారం. దీంతో విచారణను ఎదుర్కొంటున్న కొందరు మిల్లర్లకు తాత్కాలిక ఊరట లభించింది. పరారీలో ఉన్నట్లు ప్రచారం జరుగుతున్న సుమారు 80 మంది మిల్లర్లలో రైస్ మిల్లర్ల సంఘానికి చెందిన ప్రముఖులు కూడా ఉన్నట్లు చర్చ జరుగుతోంది.
పూర్తిస్థాయి విచారణ తర్వాత నివేదిక
ఈ వ్యవహారంపై సీఐడీ డీఎస్పీ శ్రీనివాస్ మాట్లాడుతూ... సన్నబియ్యానికి బదులుగా దొడ్డు బియ్యం సరఫరా చేసిన కేసులో మొత్తం ఎనిమిది కేసులు నమోదు చేసినట్లు తెలిపారు. ఈ కేసుల్లో కొందరిని అరెస్టు చేశామని, ప్రస్తుతం పూర్తిస్థాయి విచారణ కొనసాగుతోందని పేర్కొన్నారు. విచారణ పూర్తయిన అనంతరం సమగ్ర నివేదిక సిద్ధం చేస్తామని వెల్లడించారు.
జిల్లాలో రైస్ మిల్లుల వ్యవహారం రోజుకో మలుపు తిరుగుతుండటంతో సీఐడీ తదుపరి చర్యలపై ఆసక్తి నెలకొంది. విచారణ పూర్తయితే మరిన్ని కీలక విషయాలు వెలుగులోకి వచ్చే అవకాశం ఉందని ప్రజలు భావిస్తున్నారు.
