రామగుండం అభివృద్ధి పనులు గడువులోగా పూర్తి చేయాలి
- జనవరి 15 నాటికి నూతన ప్రభుత్వ ఆసుపత్రి భవనం పూర్తి చేయాలి
- పలు అభివృద్ధి పనుల క్షేత్రస్థాయి పరిశీలనలో జిల్లా కలెక్టర్ కోయ శ్రీహర్ష ఆదేశాలు
రామగుండం, అక్టోబర్ 16(విజయ క్రాంతి) నగరంలో చేపడుతున్న వివిధ అభివృద్ధి పనులను వేగవంతం చేసి, నిర్దేశిత గడువులోగా పూర్తి చేయాలని పెద్దపల్లి జిల్లా కలెక్టర్ కోయ శ్రీహర్ష(District Collector Koya Sriharsha) సంబంధిత అధికారులను ఆదేశించారు. శుక్రవారం రామగుండం నగరంతో పాటు మంథని మండలం చిల్లపల్లి గ్రామంలో పలు అభివృద్ధి పనులను ఆయన క్షేత్రస్థాయిలో పరిశీలించి అధికారులకు పలు సూచనలు చేశారు.
రామగుండం–లింగాపూర్ రహదారి నిర్మాణ పనులు, ప్రభుత్వ జనరల్ ఆసుపత్రి ప్రాంగణంలో నూతన ఆసుపత్రి భవనం, నర్సింగ్ కళాశాల నిర్మాణ పనులను కలెక్టర్ తనిఖీ చేశారు. అలాగే ప్రభుత్వ ఆసుపత్రిలో వైద్య సేవలు, 36వ డివిజన్‌లో జీవో 76 దరఖాస్తుల ధ్రువీకరణ, ప్రభుత్వ జూనియర్ కళాశాలలు, బాలికల కళాశాలలో అదనపు తరగతి గదుల నిర్మాణాలను పరిశీలించారు.
జనవరి 15 నాటికి ఆసుపత్రి భవనం పూర్తి
రామగుండం ప్రభుత్వ జనరల్ ఆసుపత్రి ప్రాంగణంలో నిర్మిస్తున్న నూతన ఆసుపత్రి భవనాన్ని జనవరి 15 నాటికి పూర్తి చేయాలని కలెక్టర్ ఆదేశించారు. సంక్రాంతి పండుగ సందర్భంగా భవనాన్ని ప్రారంభించే దిశగా పనులు చేపట్టాలని సూచించారు. నిర్మాణంలో నాణ్యతా ప్రమాణాలు పాటిస్తూ, పనుల పురోగతిని నిరంతరం పర్యవేక్షించాలని తెలిపారు. నర్సింగ్ కళాశాల భవన నిర్మాణాన్ని ఫిబ్రవరి నాటికి పూర్తి చేయాలని స్పష్టం చేశారు.
రహదారి పనులకు ఆటంకాలు తొలగించాలి
రామగుండం–లింగాపూర్ రహదారి నిర్మాణానికి అడ్డంకిగా ఉన్న విద్యుత్ స్తంభాలు, నీటి పైపులైన్లను త్వరితగతిన మార్చాలని కలెక్టర్ సూచించారు. సంబంధిత శాఖల అధికారులు సమన్వయంతో పనిచేసి, రహదారి నిర్మాణ పనులు వేగంగా కొనసాగేందుకు చర్యలు తీసుకోవాలని ఆదేశించారు.
జీవో 76 దరఖాస్తుల పరిశీలనకు గడువు
రామగుండం 36వ డివిజన్‌లో జీవో 76 కింద వచ్చిన దరఖాస్తుల ధ్రువీకరణ ప్రక్రియను అక్టోబర్ 25లోగా పూర్తి చేయాలని కలెక్టర్ ఆదేశించారు. ప్రతి దరఖాస్తును నిబంధనల ప్రకారం పరిశీలించాలని, సంబంధిత భూములు సింగరేణి సంస్థకు చెందినవా కాదా అనే అంశాన్ని క్షుణ్ణంగా ధ్రువీకరించాలని సూచించారు.
ప్రభుత్వ ఆసుపత్రిలో మెరుగైన వైద్యం
రామగుండం ప్రభుత్వ జనరల్ ఆసుపత్రిలో రోగులకు అందుతున్న వైద్య సేవలు, అందుబాటులో ఉన్న సదుపాయాలను కలెక్టర్ పరిశీలించారు. అన్ని విభాగాలకు చెందిన నిపుణులైన వైద్యులు అందుబాటులో ఉన్నందున శస్త్రచికిత్సల సంఖ్యను పెంచాలని సూచించారు. ప్రజలు శస్త్రచికిత్సల కోసం ప్రైవేటు ఆసుపత్రులకు వెళ్లాల్సిన అవసరం లేకుండా ప్రభుత్వ ఆసుపత్రిలోనే మెరుగైన వైద్య సేవలు అందించాలని ఆదేశించారు. ఆసుపత్రి పరిసరాలను పరిశుభ్రంగా ఉంచుతూ పారిశుధ్య నిర్వహణకు ప్రాధాన్యత ఇవ్వాలని తెలిపారు.
విద్యాసంస్థల్లో తరగతి గదుల నిర్మాణాలు వేగవంతం
రామగుండం ప్రభుత్వ జూనియర్ కళాశాల, శారదానగర్ ప్రభుత్వ జూనియర్ బాలికల కళాశాలలో నిర్మిస్తున్న అదనపు తరగతి గదుల పనులను కలెక్టర్ పరిశీలించారు. నిర్మాణాలు, పాఠశాలలు, కళాశాలల్లో చేపడుతున్న మరమ్మతు పనులను త్వరగా పూర్తి చేసి విద్యార్థులకు అందుబాటులోకి తీసుకురావాలని అధికారులకు సూచించారు. పనుల్లో నాణ్యతా ప్రమాణాలు తప్పనిసరిగా పాటించాలని స్పష్టం చేశారు.
మహిళా సమాఖ్యల సోలార్ ప్లాంట్ పరిశీలన
మంథని మండలం చిల్లపల్లి గ్రామంలో గౌతమి, రామగిరి మహిళా సమాఖ్యల సంయుక్త ఆధ్వర్యంలో ఏర్పాటు చేసిన ఒక మెగావాట్ సామర్థ్యం గల సౌర విద్యుత్ కేంద్రాన్ని కలెక్టర్ పరిశీలించారు. ఈ కేంద్రం ద్వారా ప్రస్తుతం రోజుకు సుమారు 4,500 యూనిట్ల విద్యుత్‌ను గుంజపడుగు ఉపకేంద్రానికి సరఫరా చేస్తున్నట్లు అధికారులు వివరించారు. రోజుకు 6,000 యూనిట్ల విద్యుత్ ఉత్పత్తి లక్ష్యంగా పెట్టుకున్నట్లు తెలిపారు.
ప్రత్యేక విద్యుత్ లైన్ అందుబాటులో లేకపోవడంతో పూర్తి సామర్థ్యాన్ని వినియోగించుకోలేకపోతున్నామని, కొత్త విద్యుత్ లైన్ ఏర్పాటుకు సుమారు రూ.28 లక్షలు అవసరమవుతాయని అధికారులు కలెక్టర్‌కు వివరించారు. దీనికి సంబంధించిన పూర్తి వివరాలతో ప్రభుత్వానికి ప్రతిపాదనలు సమర్పించాలని ఆయన సూచించారు. ఈ పర్యటనలో సంబంధిత శాఖల అధికారులు విశ్వప్రసాద్, రమేష్, రామకృష్ణ, రవీందర్, ప్రభాకర్ తదితరులు పాల్గొన్నారు.
