సాగుభూమిని కాపాడుకుందాం

21-11-2026 | 07:19pm

ముదిగొండ (విజయక్రాంతి): ఖేత్ బచావో అభియాన్ (Khet Bachao Abhiyan) కార్యక్రమంలో భాగంగా సాగుభూమిని సంరక్షించుకోవాల్సిన ఆవశ్యకతపై ముదిగొండ మండలం మాదాపురం గ్రామంలో శుక్రవారం వ్యవసాయ శాఖ ఆధ్వర్యంలో రైతులకు అవగాహన కార్యక్రమం నిర్వహించారు.

ఈ సందర్భంగా మండల వ్యవసాయ అధికారి నాగేశ్వరరావు మాట్లాడుతూ.. సాగు భూమిలో ఉన్న పోషకాలను గుర్తించి పంటలు సాగు చేయాలని సూచించారు. భూసారం (Soil Fertility) తెలుసుకోవడానికి ప్రతి రైతు తప్పనిసరిగా మట్టి పరీక్షలు (Soil Testing) చేయించుకోవాలని కోరారు.

ప్రస్తుతం ఎల్‌నినో ప్రభావం కారణంగా వర్షాలు కురవకపోవడంతో పాటు విద్యుత్ సరఫరాలో అంతరాయాలు ఏర్పడుతున్నాయని, రైతులు బోరుబావులపై ఆధారపడాల్సి వస్తోందని తెలిపారు. ఈ పరిస్థితుల్లో అధిక నీటి అవసరమయ్యే వరి, మొక్కజొన్న పంటలను సాగు చేయకుండా ప్రత్యామ్నాయ పంటలపై దృష్టి సారించాలని సూచించారు.

వచ్చే యాసంగి సీజన్‌లో ఆరుతడి పంటలు, అపరాలు సాగు చేయాలని కోరారు. ప్రస్తుతం మండలంలో పెసర, మినుము, కుసుమ విత్తనాలు (Seed Availability) రైతులకు అందుబాటులో ఉన్నాయని, వాటిని సద్వినియోగం చేసుకోవాలని సూచించారు.

ఈ కార్యక్రమంలో గ్రామ సర్పంచ్, ఉప సర్పంచ్, వ్యవసాయ విస్తరణ అధికారి ప్రియాంక, వ్యవసాయ అనుబంధ శాఖల అధికారులు, రైతులు పాల్గొన్నారు.

మరిన్ని వార్తలు