తెలంగాణలో చలి పంజా!
తెలంగాణ రాష్ట్రవ్యాప్తంగా చలి తీవ్రత (Cold Wave) క్రమంగా పెరుగుతోంది. రానున్న మూడు రోజుల్లో ఉష్ణోగ్రతలు మరింత పడిపోయే అవకాశం ఉందని వాతావరణ శాఖ (Weather Department) హెచ్చరించింది. కొన్ని ప్రాంతాల్లో కనిష్ఠ ఉష్ణోగ్రతలు 11 నుంచి 12 డిగ్రీల వరకు నమోదయ్యే అవకాశముందని అంచనా వేసింది.
సాయంత్రం 6 గంటల నుంచి ఉదయం 7 గంటల వరకు చలి తీవ్రత ఎక్కువగా ఉంటోంది. దీంతో ప్రజలు రాత్రి, తెల్లవారుజామున బయటకు రావడానికి ఇబ్బందులు పడుతున్నారు. ముఖ్యంగా వృద్ధులు, చిన్నపిల్లలు చలి నుంచి రక్షణ పొందేందుకు తగిన జాగ్రత్తలు తీసుకోవాలని వైద్య నిపుణులు సూచిస్తున్నారు.
మంగళవారం రాష్ట్రంలో అత్యల్ప ఉష్ణోగ్రత నిర్మల్ జిల్లా కుబీర్‌లో నమోదైంది. అక్కడ కనిష్ఠంగా 14.6 డిగ్రీల ఉష్ణోగ్రత రికార్డయింది. హైదరాబాద్‌తో పాటు రాష్ట్రంలోని మొత్తం 21 జిల్లాల్లో ఉష్ణోగ్రతలు 15 డిగ్రీల కంటే తక్కువకు పడిపోయాయి.
రాబోయే మూడు రోజుల్లో చలి తీవ్రత మరింత పెరిగే అవకాశం ఉండటంతో ప్రజలు అప్రమత్తంగా ఉండాలని వాతావరణ శాఖ సూచించింది. ఉదయం, రాత్రి వేళల్లో వెచ్చని దుస్తులు (Winter Wear) ధరించాలని, ముఖ్యంగా చిన్నపిల్లలు, వృద్ధులు చలి బారిన పడకుండా జాగ్రత్తలు తీసుకోవాలని సూచిస్తున్నారు.
