అభ్యర్థులకు తిరిగి రాని నామినేషన్ రుసుం

బిజినేపల్లి, అక్టోబర్ 14: మండల వ్యాప్తంగా 2025 డిసెంబరులో జరిగిన గ్రామ పంచాయతీ ఎన్నిక(Gram Panchayat Elections)ల్లో పోటీ చేసేందుకు సర్పంచు, వార్డు సభ్యులు డిపాజిటుగా నామినేషన్ రుసుం చెల్లించారు. ఎన్నికల అనంతరం గెలిచిన అభ్యర్థులతో పాటు, ఎన్నికల్లో డిపాజిట్ సాధించిన అభ్యర్థులకు తిరిగి ఎన్నికల డిపాజిట్ రుసుం చెల్లించాలి.

ఎన్నికలు గడిచి ఏడాది కావస్తున్నా అభ్యర్థులకు డిపాజిట్ రుసుమును ఇంకా అధికారులు చెల్లించలేదు. అభ్యర్థులు ఎన్నికల్లో చెల్లించిన డిపాజిట్ రుసుం తిరిగి ఇప్పించాలని మండల పరిషత్తు కార్యాలయాల చుట్టూ తిరుగుతున్నారు. మండలానికి చెందిన అభ్యర్థులు పలుమార్లు తమ డబ్బులు తమకు ఇవ్వాలని అడిగితే, ఉన్నతాధికారులు ఇవ్వలేదని, వారు ఇస్తే ఇస్తాం అని చెప్పి దాట వేస్తున్నారు.

సర్పంచ్ అభ్యర్థులుగా పోటీ చేసిన అభ్యర్థులు తమ మద్దతు దారులైన వార్డు సభ్యులకు ఇంటి పన్ను, నామినేషన్ రుసుం వంటివి చెల్లించారు. ఇలా వారు ఎన్నికల్లో రూ.లక్షలు ఖర్చు చేశారు. ఇప్పటికే అభ్యర్థులు అప్పులపాలై వారికున్న భూములు, ఇతర స్థిరాస్తులు అమ్ముకుంటుంటే అధికారులు మాత్రం  డిపాజిట్ రుసుం ఇవ్వడం లేదని వాపోతున్నారు. ఎల్ నినో ప్రభావం ఉన్న ప్రస్తుత పరిస్థితుల్లో నామినేషన్ డబ్బులు తిరిగి ఇస్తే తమకు కాస్త ఉపశమనంగా ఉంటుందని అభ్యర్థులు భావిస్తున్నారు. కలెక్టర్ స్పందించి అభ్యర్థుల డబ్బులు తిరిగి ఇచ్చేలా చర్యలు తీసుకోవాలని కోరుతున్నారు.