మోదీతో రేవంత్ భేటీ..రూ.30 వేల కోట్ల ప్యాకేజీ డిమాండ్

న్యూఢిల్లీ: తెలంగాణ అభివృద్ధికి కేంద్రం సహకారం కోరుతూ ముఖ్యమంత్రి రేవంత్‌రెడ్డి ఢిల్లీ పర్యటనకు సిద్ధమయ్యారు. ఆదివారం మధ్యాహ్నం 12 గంటలకు ప్రధానమంత్రి నరేంద్ర మోదీతో సీఎం సమావేశం కానున్నారు. ఈ భేటీలో నీటిపారుదల శాఖ మంత్రి ఉత్తమ్‌కుమార్‌రెడ్డితో పాటు మంత్రి వాకిటి శ్రీహరి కూడా పాల్గొననున్నారు (PM Modi Meeting).

రాష్ట్రంలో ఎల్‌నినో ప్రభావం, వర్షాభావ పరిస్థితులు, వ్యవసాయ రంగంపై పడుతున్న ప్రభావాన్ని ప్రధాని దృష్టికి తీసుకెళ్లనున్నారు. కరువు పరిస్థితులను ఎదుర్కొంటున్న రైతులకు అండగా నిలిచేందుకు తెలంగాణకు రూ.30 వేల కోట్ల ప్రత్యేక ఆర్థిక సాయం అందించాలని కేంద్రాన్ని కోరనున్నారు (El Nino Impact).గోదావరి–కావేరీ నదుల అనుసంధాన ప్రాజెక్టులో తెలంగాణకు తగిన వాటా కల్పించాలని సీఎం విజ్ఞప్తి చేయనున్నారు. ఇచ్చంపల్లి వద్ద బ్యారేజీ నిర్మించి తరలించే జలాల్లో 50 శాతం తెలంగాణకు కేటాయించాలని కోరనున్నట్లు తెలుస్తోంది.

దీర్ఘకాలంగా పెండింగ్‌లో ఉన్న తుమ్మిడిహెట్టి బ్యారేజీ నిర్మాణానికి అవసరమైన అనుమతులు మంజూరు చేయడంతో పాటు మహారాష్ట్ర సహకారం అందేలా కేంద్రం చొరవ తీసుకోవాలని కోరనున్నారు. సమ్మక్కసాగర్ ప్రాజెక్టుకు కేంద్ర జల సంఘం అనుమతులతో పాటు ఇతర అనుమతుల అంశాన్ని కూడా ప్రధాని దృష్టికి తీసుకెళ్లనున్నారు (Irrigation Projects).

తెలంగాణలో నిర్వహించనున్న గ్లోబల్ సమ్మిట్‌కు హాజరుకావాలని ప్రధాని మోదీని సీఎం రేవంత్‌రెడ్డి ఆహ్వానించనున్నారు. అలాగే ఖేలో ఇండియా క్రీడల ప్రారంభోత్సవానికి కూడా రావాలని కోరనున్నట్లు తెలుస్తోంది. రైతుల సంక్షేమం, సాగునీటి ప్రాజెక్టులు, నదుల అనుసంధానం, రాష్ట్రానికి ప్రత్యేక ఆర్థిక సాయం వంటి అంశాలను ప్రధాని ముందుంచేందుకు సీఎం సిద్ధమయ్యారు. ఈ భేటీలో తెలంగాణ ప్రతిపాదనలపై కేంద్రం ఎలాంటి నిర్ణయం తీసుకుంటుందన్నది ఆసక్తికరంగా మారింది.