5 ఓట్ల తేడాతో గ్రామ రాజకీయాల్లో కొత్త అధ్యాయం

సంగారెడ్డి,(విజయ క్రాంతి): కంది మండలం కౌలంపేట గ్రామ సర్పంచ్ ఎన్నికల్లో ప్రజలు చరిత్రను రాసారు. స్వాతి శ్రీశైలం కేవలం 5 ఓట్ల తేడాతో విజయం సాధించడంతో గ్రామ రాజకీయాల్లో కొత్త దశకు నాంది పలికింది. ప్రారంభ రౌండ్ల నుంచే ఉత్కంఠ కొనసాగగా, ప్రతి ఓటు విలువ మరింతగా పెరిగిపోయింది. చివరి రౌండ్ వరకు హోరాహోరీగా సాగిన కౌంటింగ్ ఫలితాల్లో, స్వాతి విజేతగా నిలవడం గ్రామం అంతటా హర్షాన్ని రేకెత్తించింది. గ్రామ పెద్దలు, మహిళలు, యువత ఇలా అన్ని వర్గాల ప్రజలు ఈ విజయాన్ని స్వాగతించారు.

ప్రత్యేకించి మహిళా ఓటర్లు భారీ సంఖ్యలో పోలింగ్‌కు రావడం, శాంతి, సమగ్రాభివృద్ధిని వాగ్దానం చేసిన శ్రావణికి బలమైన మద్దతుగా మారింది. విజయం అనంతరం స్వాతి శ్రీశైలం మాట్లాడుతూ, ఇది నా విజయం కాదు, ఇది కవలంపేట గ్రామ ప్రజల విజయం. నాకు నమ్మకంతో మద్దతిచ్చిన ప్రతిఒక్కరి విశ్వాసాన్ని నిలబెట్టుకునేందుకు పారదర్శక పాలన, శుచిత్వం, మహిళల సురక్ష, యువతాభివృద్ధి వంటి అంశాలపై నిబద్ధతతో పనిచేస్తాను అని తెలిపారు. పోటీ కఠినతరంగా ఉండగా, కేవలం 5 ఓట్ల తేడాతో వచ్చిన ఈ ఫలితం గ్రామ ప్రజల రాజకీయ చైతన్యాన్ని స్పష్టంగా చాటిచెప్పింది. అభ్యర్థుల మధ్య సాగిన మాటామంతీలు, ఇంటింటా జరిగిన ప్రచారం, మహిళా సమూహాల మద్దతు, ఈ ఎన్నికలను మరింత కీలకంగా మార్చాయి. స్థానికులు ఈ ఎన్నికల ఫలితాన్ని గ్రామ అభివృద్ధికి మలుపు గా పేర్కొన్నారు. కొత్త సర్పంచ్‌గా బాధ్యతలు చేపట్టబోతున్న స్వాతి శ్రీశైలం పై ప్రజలు మరింత నమ్మకం ఉంచుతూ, గ్రామాన్ని ఆదర్శ గ్రామంగా తీర్చిదిద్దుతారని ఆశాభావం వ్యక్తం చేస్తున్నారు.