నడిరోడ్డుపై ఆగిపోయిన 108 అంబులెన్స్

రాజన్న సిరిసిల్ల: రాజన్న సిరిసిల్ల జిల్లా ఎల్లారెడ్డిపేట మండలంలో(Yellareddipet Mandal) శనివారం ఒక వృద్ధురాలిని ఆసుపత్రికి తరలిస్తుండగా ఆమె ప్రయాణిస్తున్న 108 అత్యవసర వాహనం మధ్యలో మొరాయించడంతో ఆమెను మరో అంబులెన్స్‌లోకి మార్చాల్సి వచ్చిందని అధికారులు తెలిపారు. అందిన సమాచారం ప్రకారం, లక్ష్మీపూర్ తండాకు చెందిన భుక్యా జెమిలి తన ఇంటి సమీపంలో ప్రమాదవశాత్తు కింద పడటంతో కాలికి గాయమైంది. ఆమె కుటుంబ సభ్యులు వెంటనే 108 అత్యవసర సేవకు సమాచారం అందించారు. 

అంబులెన్స్ వచ్చి ఆ మహిళను ఆసుపత్రికి తరలించడం ప్రారంభించింది. అయితే, కొంత దూరం ప్రయాణించిన తర్వాత, ఆ వాహనం ఎల్లారెడ్డిపేట మండల కేంద్రం వద్ద హఠాత్తుగా ఆగిపోయింది. వెంటనే మరో 108 అంబులెన్స్‌ను ఏర్పాటు చేసి, ఆ మహిళను చికిత్స కోసం ప్రభుత్వ ఆసుపత్రికి తరలించారు. అత్యవసర సేవలు అందించే 108 ఇలా రోడ్డుపై ఆగిపోవడంతో స్థానికులు ఆగ్రహం వ్యక్తం చేస్తూ.. మరో అంబులెన్స్ వచ్చే వరకు రోగి అవస్థ పడినట్లు ఆవేదన వ్యక్తం చేశారు.