విశాఖ స్టీల్ ప్లాంట్‌లో వరస ప్రమాదాలు

విశాఖపట్నం: విశాఖపట్నం ఉక్కు కర్మాగారంలో(Visakha Steel Plant) ఇటీవల జరిగిన పేలుడుపై కేంద్రం నియమించిన త్రీమెన్ కమిటీ(Three-member committee) సమగ్ర విచారణ కొనసాగుతుండగా గురువారం మరో ప్రమాదం చోటుచేసుకోవడం ఉద్యోగుల్లో భయాందోళన రేకెత్తించింది. అయితే, ఈ ఘటనలో ఎవరికీ ఎటువంటి గాయాలు కాలేదని అధికారులు తెలిపారు. ప్లాంట్‌లోని 'స్టీల్ మెల్టింగ్ షాప్-1' (SMS-1) విభాగంలో ఉన్న ఆర్గాన్ రిన్సింగ్ స్టేషన్(Organ Rinsing Station) వద్ద, లాడిల్ (ద్రవ ఉక్కును మోసుకెళ్లే పాత్ర) నుండి కరిగిన ఉక్కు కింద పడింది.

అయితే, అదృష్టవశాత్తూ ఆ సమయంలో అక్కడ ఎవరూ లేకపోవడంతో పెద్ద ప్రమాదం తప్పింది. ఈ ఘటన గురువారం ఉదయం సుమారు 6:30 గంటలకు జరిగింది. ఇంతలో, బుధవారం మరో కార్మికుడు మరణించడంతో విశాఖపట్నం ఉక్కు కర్మాగారంలో(Visakhapatnam Steel Plant) జరిగిన పేలుడులో మరణించిన వారి సంఖ్య తొమ్మిదికి పెరిగింది. విశాఖపట్నంలోని రాష్ట్రీయ ఇస్పత్ నిగమ్ లిమిటెడ్ (విశాఖ స్టీల్ ప్లాంట్)లో జూన్ 8న జరిగిన ఆకస్మిక తీవ్ర పేలుడులో ఎనిమిది మంది కార్మికులు మరణించగా, మరో ఆరుగురు గాయపడ్డారు. ఆ తర్వాత ఈరోజు తీవ్రమైన కాలిన గాయాలతో మరో కార్మికుడు మరణించాడు. 

తాజాగా మరణించిన వ్యక్తిని పైడిరాజుగా గుర్తించారు. ఆయన గురువారం ఉదయం 8:17 గంటలకు తీవ్ర కాలిన గాయాల కారణంగా కన్నుమూశారని విశాఖపట్నం జిల్లా జాయింట్ కలెక్టర్ జి. విద్యాధరి మీడియాకి తెలిపారు. పోస్ట్‌మార్టం కోసం మృతదేహాన్ని నౌకాశ్రయ నగరంలోని కింగ్ జార్జ్ ఆసుపత్రికి తరలించినట్లు ఆమె తెలిపారు. అనంతరం, పైడిరాజు మృతదేహాన్ని ఆయన కుటుంబ సభ్యులకు అప్పగించారు. గాయపడిన ఆరుగురు కార్మికులలో 90 శాతం కాలిన గాయాలైన ఇద్దరిలో పైడిరాజు ఒకరని జాయింట్ కలెక్టర్ పేర్కొన్నారు.