రాహుల్ గాంధీ దిష్టిబొమ్మ దగ్ధం.. బీజేవైఎం నాయకుల అరెస్ట్

హైదరాబాద్‌: కాంగ్రెస్‌ అధినేత రాహుల్‌ గాంధీ 'హిందూవ్యతిరేక' వ్యాఖ్యలు చేశారన్న ఆరోపణలపై హైదరాబాద్‌లో గురువారం బీజేవైఎం నేతలు, కార్యకర్తలను పోలీసులు అదుపులోకి తీసుకు న్నారు. రాష్ట్రపతి ప్రసంగానికి ధన్యవాద తీర్మానంపై చర్చలో పాల్గొన్న సందర్భంగా సోమవారం లోక్‌సభలో రాహుల్ గాంధీ తన ప్రసంగంలో చేసిన వ్యాఖ్యలకు నిరసనగా భారతీయ జనతా యువమోర్చా (బీజేవైఎం) పిలుపునిచ్చింది.

నాంపల్లిలోని బీజేపీ కార్యాలయం వద్దకు చేరుకున్న బీజేవైఎం కార్యకర్తలు తెలంగాణలోని కాంగ్రెస్‌ ప్రధాన కార్యాలయం గాంధీభవన్‌కు ర్యాలీగా వెళ్లేందుకు ప్రయత్నించారు. ఆందోళనకారులు కాంగ్రెస్ నాయకుడికి వ్యతిరేకంగా నినాదాలు చేయడంతో పాటు కాంగ్రెస్ ఎంపీ దిష్టిబొమ్మను దహనం చేశారు. అనుమతి లేకపోవడంతో పోలీసులు పాదయాత్రను అడ్డుకున్నారు. తమ పాదయాత్రను కొనసాగించాలని డిమాండ్ చేస్తూ బీజేవైఎం కార్యకర్తలు రోడ్డుపై బైఠాయించడంతో పోలీసులు వారిని అదుపులోకి తీసుకునేందుకు చర్యలు చేపట్టారు. కొంతమంది నిరసనకారులను పోలీసు వాహనాల్లోకి ఎక్కించి నగరంలోని వివిధ పోలీసు స్టేషన్‌లకు తరలించారు.