మధిరను ఆదర్శ మున్సిపాలిటీగా అభివృద్ధి చేస్తాం: భట్టి

హైదరాబాద్: మధిర నియోజకవర్గాన్ని రాష్ట్రంలోనే ఒక ఆదర్శ నియోజకవర్గంగా తీర్చిదిద్దుతానని ఉప ముఖ్యమంత్రి భట్టి విక్రమార్క పేర్కొన్నారు. రాజకీయాలు కాకుండా అభివృద్ధికి ప్రాధాన్యత ఇవ్వాలని పేర్కొంటూ, మధిర ప్రజలకు ఎప్పుడు అవసరం వచ్చినా తాను సిద్ధంగా ఉంటానని హామీ ఇచ్చారు. సోమవారం డిప్యూటీ సీఎం భట్టి మధిర మున్సిపాలిటీలోని పలు వార్డుల్లో ఎన్నికల ప్రచారం నిర్వహించారు. రోడ్‌షోలో పాల్గొన్న ప్రజలను ఉద్దేశించి ఆయన మాట్లాడుతూ... రాష్ట్రంలో కాంగ్రెస్ పార్టీ అధికారంలో ఉందని, మున్సిపాలిటీలో కూడా కాంగ్రెస్ అభ్యర్థులు ఎన్నికైతే, మధిర పట్టణాన్ని మరింతాభివృద్ధి చేసుకునే అవకాశం లభిస్తుందని ఆయన చెప్పారు.

గత పదేళ్లుగా కాంగ్రెస్ అధికారంలో లేదని, అప్పటి బీఆర్ఎస్ ప్రభుత్వం నిధులు మంజూరు చేయలేదని ఆయన వివరించారు. మున్సిపల్ పాలకవర్గం కూడా కాంగ్రెస్ ఆధీనంలో లేకపోవడంతో అభివృద్ధి జరగలేదన్నారు. ఇప్పుడు రాష్ట్రంలో కాంగ్రెస్ అధికారంలో ఉండటం, తాను ఉప ముఖ్యమంత్రిగా ఉంటూ ఆర్థిక, విద్యుత్, ప్రణాళిక శాఖలను నిర్వహిస్తుండటంతో పాటు మధిర అభివృద్ధి చేసేందుకు కృష్ణ చేస్తానని భట్టి హామీ ఇచ్చారు.

మధిరలో అనేక అభివృద్ధి పనులకు అనుమతులు లభించాయని, ఈ పనులను క్రమపద్ధతిలో సమర్థవంతంగా, ఎలాంటి వృధా లేకుండా పూర్తి కావాలంటే, ఒక బలమైన మున్సిపల్ పరిపాలన అవసరమన్నారు. అందువల్ల, జాగ్రత్తగా ఎంపిక చేసిన కాంగ్రెస్ కూటమి అభ్యర్థులను ఎన్నుకోవాలని ఆయన ఓటర్లకు విజ్ఞప్తి చేశారు.