త్వరలోనే రాజీనామా! బ్రిటన్ ప్రధానిపై ట్రంప్ సంచలన వ్యాఖ్యలు

వాషింగ్టన్: బ్రిటన్ ప్రధాని కీర్ స్టార్మర్(Keir Starmer)పై అమెరికా అధ్యక్షుడు డొనాల్డ్ ట్రంప్(US President Donald Trump) సంచలన వ్యాఖ్యలు చేశారు. స్టార్మర్ త్వరలోనే ప్రధాని పదవికి రాజీనామా చేస్తారని ట్రంప్ జోస్యం చెప్పారు. బ్రిటన్ వలసలు, ఇంధన విధానాల్లో స్టార్మర్ ఘోరంగా విఫలమయ్యారని ట్రంప్ ఆరోపించారు. స్టార్మర్ భవిష్యత్తు బాగుండాలని ట్రంప్ ఆశాభావం వ్యక్తం చేశారు. బ్రిటన్ లో నాయకత్వ మార్పు నేపథ్యంలో ట్రంప్ వ్యాఖ్యలకు ప్రాధాన్యం సంతరించుకుంది.

"యునైటెడ్ కింగ్‌డమ్ ప్రధాన మంత్రి పదవికి కీర్ స్టార్మర్ రాజీనామా చేస్తారు" అని ట్రంప్ 'ట్రూత్ సోషల్'లో ఒక పోస్ట్ చేశారు. అయితే, ఆయనకు దీనికి సంబంధించి ఏదైనా కచ్చితమైన సమాచారం తెలుసా లేక కేవలం ఇతరుల చర్చల్లో భాగస్వామి అవుతున్నారా? అనేది స్పష్టంగా తెలియదు. ఈ వారం ప్రారంభంలో ఫ్రాన్స్‌లో జరిగిన G7 శిఖరాగ్ర సమావేశంలో ఇద్దరు నాయకులు కలుసుకున్నప్పటి నుండి ట్రంప్, స్టార్మర్‌తో మాట్లాడలేదని బ్రిటన్ పీఏ మీడియా వెల్లడించింది.

తన సోషల్ మీడియా పోస్ట్‌లో, యూకేకు చెందిన మధ్య-వామపక్ష లేబర్ పార్టీ నాయకుడు స్టార్మర్‌ను ట్రంప్ విమర్శించారు. అసమర్థ విధాన నిర్ణయాలే ఆయన రాజకీయ పతనానికి కారణమవుతాయని పేర్కొన్నారు. ఇటీవలి ఉప ఎన్నికలో గెలిచిన, పదవీ విరమణ చేస్తున్న మాంచెస్టర్ మేయర్ ఆండీ బర్న్‌హామ్‌కు మద్దతు పెరుగుతుండటంతో, స్టార్మర్ సోమవారం పదవి నుంచి వైదొలగనున్నారని యూకే మీడియా విస్తృతంగా నివేదిస్తోంది.