రామ్‌చరణ్ హీరోగా దర్శకుడు బుచ్చిబాబు సానా తెరకెక్కిస్తున్న రూరల్ యాక్షన్ డ్రామా ‘పెద్ది’. వృద్ధి సినిమాస్ పతాకంపై వెంకట సతీశ్ కిలారు నిర్మిస్తున్న ఈ చిత్రాన్ని మైత్రి మూవీ మేకర్స్, సుకుమార్ రైటింగ్స్ సమర్పిస్తున్నాయి. ఈ చిత్రంలో జాన్వీకపూర్ హీరోయిన్‌గా నటిస్తుండగా, కన్నడ సూపర్‌స్టార్ శివరాజ్‌కుమార్ ఇందులో కీలక పాత్ర పోషిస్తున్నారు. ఈ చిత్రంలో జగపతిబాబు, దివ్యేందుశర్మ కూడా ప్రముఖ పాత్రల్లో కనిపించనున్నారు.

ఇప్పటివరకు రిలీజ్ చేసిన ఫస్ట్‌లుక్ పోస్టర్లు, గ్లింప్స్, తొలిగీతం ‘చికిరి చికిరి’కి వచ్చిన అద్భుతమైన స్పందనతో ఈ సినిమాపై భారీ అంచనాలేర్పడ్డాయి. ముఖ్యంగా ‘చికిరి’ ప్రపంచవ్యాప్తంగా 110 మిలియన్ల మార్కును దాటి టాప్‌లో ట్రెండ్ అవుతోంది. ప్రస్తుతం ఈ చిత్రబృందం కథానాయకుడు రామ్‌చరణ్, శివరాజ్‌కుమార్ మధ్య వచ్చే పోరాట ఘట్టాలను చిత్రీకరిస్తోంది.

హైదరాబాద్ అల్యూమినియం ఫ్యాక్టరీలో వేసిన భారీ సెట్‌లో ఈ అతిపెద్ద యాక్షన్ సీక్వెన్స్ షూటింగ్ జరుగుతోంది. బాలీవుడ్ స్టార్ విక్కీ కౌశల్ తండ్రి, ప్రముఖ స్టంట్ డైరెక్టర్ ‘దంగల్’ ఫేమ్ షామ్ కౌశల్ పర్యవేక్షణలో ఈ పోరాట సన్నివేశాల చిత్రీకరణ జరుగుతోంది. నవకాంత్ స్టంట్ మాస్టర్‌గా వ్యవహరిస్తున్నారు. ఈ సీక్వెన్స్ సినిమాకి హైలైట్ కానుందని టీమ్ పేర్కొంటోంది. 2026, మార్చి 27న విడుదల కానున్న ఈ చిత్రానికి సంగీతం: ఏఆర్ రెహమాన్; డీవోపీ: ఆర్ రత్నవేలు; ప్రొడక్షన్ డిజైన్: అవినాష్ కొల్లా; ఎడిటర్: నవీన్ నూలి.