రవితేజ 2022లో ‘ధమాకా’ సినిమాతో పెద్ద హిట్ అందుకున్నారు. ఏకంగా 100 కోట్ల గ్రాస్ కలెక్షన్స్ తెచ్చి రవితేజ కెరీర్‌లోనే పెద్ద హిట్ అయిందీ చిత్రం. రవితేజ, శ్రీలీల జంటగా త్రినాథరావు నక్కిన దర్శకత్వంలో పీపుల్ మీడియా ఫ్యాక్టరీ బ్యానర్‌లో తెరకెక్కిన ఈ సినిమా మంచి విజయం సాధించింది. సాంగ్స్, మ్యూజిక్ సినిమాకు బాగా కలిసివచ్చాయి. శ్రీలీల, రవితేజ మాస్ డ్యాన్స్, కామెడీ పండింది.

అయితే ఇప్పుడు ఈ సినిమాకు సీక్వెల్ తీస్తున్నారని తెలుస్త్తోంది. గతంలోనే ఈ సినిమాకు సీక్వెల్ ఉంటుందని ప్రచారం జరిగింది. తాజాగా నిర్మాణ సంస్థ ‘ధమాకా’ సీక్వెల్‌కు ‘డబుల్ ధమా కా’ అనే టైటిల్‌ను ఫిలిం ఛాంబర్‌లో రిజిస్టర్ చేయించిందని సమాచారం.

త్రినాథరావు నక్కిన ఇటీవల సందీప్ కిషన్‌తో ‘మజాకా’ సినిమా తీయగా ఆశించినంత ఫలితాన్ని ఇవ్వలేదు. ప్రస్తుతం త్రినాథరావు చేతిలో సినిమాలేమీ లేవు. దీంతో ఆయన ఈ ‘డబుల్ ధమా కా’ స్క్రిప్ట్‌పైనే రచయిత ప్రసన్నకుమార్‌తో కలిసి వర్క్ చేస్తున్నాడని సమాచారం. త్వరలోనే ఈ సినిమా ప్రకటిస్తారని.. రవితేజ, శ్రీలీల కలిసి మరోసారి రచ్చ చేస్తారని అభిమానులు ఆనందపడుతున్నారు.