సరిహద్దుల్లేని.. అమ్మ ప్రేమ!

ప్రకృతిలో విశ్వజనీనమైన ప్రేమ ఏదైనా ఉందీ అంటే అది అమ్మ ప్రేమ ఒక్కటే! భూమ్యాకాశాలు ఉన్నంత వరకు ఆ అమ్మతనమే మనిషి ఉనికిని చాటుతున్నది. ఖండాలు, దేశాలు, మతాలు, జాతులు, సంస్కృతులు వేరైనా సరే.. కన్నబిడ్డల పట్ల చూపే అమ్మప్రేమలో మాత్రం తేడా ఉండదు. ఆమె ప్రేమకు సరిహద్దులు లేవు అంటున్నారు రొమానియా ఫోటోగ్రాఫర్ మిహేలా నోరోక్. మాతృత్వ మధుమరిమలోని జీవన రహస్యాన్ని తెలుసుకునేందుకు ఆమె అన్ని దేశాల్లోనూ తిరిగి.. తల్లీబిడ్డల బంధాన్ని తన కెమెరాలో బంధించారు.

‘అట్లాస్ ఆఫ్ బ్యూటీ’ అనే వెబ్‌సైట్‌లో ఆ చిత్రాలను పొందుపరిచారు. ‘మా నాన్న పెయింటర్, చిన్నప్పటి నుంచి రంగుల మధ్యే నేను పెరిగాను. పదహారవయేట నుంచే కెమెరా పట్టుకున్నా. బతుకడానికి రకరకాల ఉద్యోగాలు చేసినా సంతృప్తి లేదు నాకు. కొంత డబ్బు పోగుచేసుకుని ఆరేళ్లుగా ప్రపంచ పర్యటన చేస్తున్నా. అందులో భాగంగా దేశదేశాల్లోని తల్లీబిడ్డల బంధాన్ని ఫోటోల్లో బంధించా. నా కంటికి అన్నిచోట్లా అమ్మప్రేమలో ఎక్కువతక్కువలు కనిపించలేదు. అదే అమ్మలోని అద్భుతం’ అంటున్నది మిహేలా నోరోక్.