హైదరాాబాద్: ఏప్రిల్ 27న ఎల్కతుర్తిలో నిర్వహించిన బీఆర్ఎస్ రజతోత్సవ వేడుకల్లో( BRS Silver Jubilee celebrations) పాల్గొన్న తర్వాత ఇంటికి వెళ్తుండగా రోడ్డు ప్రమాదంలో మరణించిన బీఆర్ఎస్ పార్టీ కార్యకర్త, వర్గల్ మండలం, తునికిమక్త గ్రామానికి చెందిన చాకలి కనకయ్య (35) భార్యకు మాజీ మంత్రి తన్నీరు హరీష్ రావు(Former Minister Tanniru Harish Rao) రూ.5 లక్షల చెక్కును అందజేశారు. కనకయ్యకు భార్య, ఇద్దరు కుమార్తెలు ఉన్నారు. ఆదివారం వర్గల్‌ మండలం తుంకి మక్తలో కనకయ్య ఇంటిని హరీశ్‌రావు సందర్శించారు. 

ఈ సందర్భంగా రావు మాట్లాడుతూ... బీఆర్ఎస్ పార్టీ ఎల్లప్పుడూ పార్టీ క్యాడర్‌కు అండగా ఉంటుందని అన్నారు. కుటుంబ సభ్యులను ఓదార్చుతూ, ఇద్దరు పిల్లలను ప్రభుత్వ రెసిడెన్షియల్ పాఠశాలల్లో చేర్పించేలా చూస్తామని చెప్పారు. పార్టీ అధ్యక్షుడు కె. చంద్రశేఖర్ రావు(Kalvakuntla Chandrashekar Rao) ఆదేశాల మేరకు తాను చెక్కును అందజేస్తున్నానని, అధికారంలోకి వచ్చిన తర్వాత తాము మరింత మద్దతు ఇస్తామని మాజీ మంత్రి చెప్పారు. స్థానిక బీఆర్ఎస్ నాయకులు కుటుంబానికి ఏదైనా సహాయం అవసరమైనప్పుడు అన్ని విధాలా మద్దతు ఇస్తారని ఆయన అన్నారు. హరీశ్ రావు వెంట ఎమ్మెల్సీ యాదవరెడ్డి, మాజీ కార్పోరేషన్ చైర్మన్ ప్రతాప్ రెడ్డి, ఇతర నేతలు ఉన్నారు.