బూర్గంపాడు,(విజయక్రాంతి): కేంద్రంలోని బీజేపీ ప్రభుత్వం సామాన్యుడి నడ్డి విరిచేలా పెంచిన గృహ వినియోగదారుల గ్యాస్ ధరలను వెంటనే తగ్గించాలని సీపీఐ పార్టీ మండల శ్రేణులు డిమాండ్ చేశారు. సోమవారం మండల కేంద్రంలోని తహశీల్దార్ కార్యాలయం ముందు ఆ పార్టీ మండల కమిటీ ఆధ్వర్యంలో వంట గ్యాస్ ధరల పెంపును నిరసన తెలిపి, ధరలను తగ్గించాలని డిప్యూటీ తహశీల్దార్ సమ్మయ్యకు వినతి పత్రాన్ని అందజేశారు.

ఈ సందర్భంగా వారు మాట్లాడుతూ... కేంద్ర ప్రభుత్వం గృహ వినియోగ గ్యాస్ సిలిండర్ ధరను రూ.60, కమర్షియల్ సిలిండర్ ధరను రూ.115 పెంచడం పేద, మధ్యతరగతి కుటుంబాలపై అదనపు భారంగా మారిందన్నారు. పేద ప్రజలపై భారాలు మోపుతున్న కేంద్ర ప్రభుత్వ విధానాలను తీవ్రంగా విమర్శించారు. వెంటనే పెంచిన గ్యాస్ ధరలను ఉపసంహరించుకోవాలని డిమాండ్ చేశారు.

నిత్యావసర వస్తువుల ధరలను అదుపులోకి తీసుకురావడానికి కేంద్ర ప్రభుత్వం తక్షణ చర్యలు తీసుకోవాలన్నారు. ఈ కార్యక్రమంలో సీపీఐ పార్టీ మండల కార్యదర్శి సబ్కా నాగేశ్వరరావు, జిల్లా సమితి సభ్యులు పేరాల శ్రీనివాసరావు, అలవాల సీతారామరెడ్డి మండల సీనియర్ నాయకులు సిద్ధారపు సుబ్బారెడ్డి, ముదిగొండ బాలకృష్ణ బలరాం, కూరపాటి దాసు, కుంజా నాగరాజ్, సింగబోయిన వెంకటేశ్వర్లు, సోయం విజయబాబు, కొమరం రాజేష్ పాల్గొన్నారు.