-డెఫ్లంఫిక్స్‌లో స్వర్ణం కైవసం

-ప్రపంచ రికార్డుతో గోల్డ్ మెడల్

-తెలంగాణ ప్రభుత్వం రూ.1.2 కోట్ల నజరానా

టోక్యో, నవంబర్ 16 : డెఫ్లంఫిక్స్‌ను భార త్ ఘనంగా ఆరంభించింది. హైదరాబాదీ షూటర్ ధనుష్ శ్రీకాంత్ ప్రపంచ రికార్డ్ ప్రదర్శనతో స్వర్ణం కైవసం చేసుకున్నాడు. 10 మీటర్ల ఎయిర్ రైఫిల్ ఈవెంట్‌లో పోటీపడిన ధనుష్ గత రికార్డులను బ్రేక్ చేస్తూ 252.2 పాయింట్లు స్కోర్ చేసి ఔరా అనిపించాడు. గతంలో తన పేరిటే ఉన్న 251.7 పాయింట్ల స్కోరును కూడా అధిగమించాడు. దీంతో ఈ విభాగంలో అగ్రస్థానం సాధించి గోల్డ్ మెడల్ సాధించాడు.

అలాగే మరో భారత షూటర్ మహ్మద్ ముర్తాజా వానియా 250.1 పాయింట్లు స్కోర్ చేసి రెండో స్థానంలో నిలిచాడు. దీంతో ఇదే విభాగంలో భారత్‌కు స్వర్ణం, రజతం రెండూ లభించాయి. క్వాలిఫికేషన్ రౌండ్‌లోనూ ధనుష్ శ్రీకాంత్ సరికొత్త రికార్డు నెలకొల్పాడు. ఫైనల్స్‌కు చేరే క్రమంలో 630.6 పాయింట్లు స్కోర్ చేశాడు. 2021 డెఫ్లంఫిక్స్‌లోనూ ధనుష్ బంగారు పతకం గెలిచాడు.

డెఫ్లంఫిక్స్‌లో ప్రపంచ రికార్డు నెలకొల్పి గోల్డ్ మెడల్ గెలిచిన ధనుష్ శ్రీకాంత్‌కు తెలంగాణ ప్రభుత్వం భారీ నజరానా ప్రకటించింది. ఈ యువ షూటర్‌కు తెలంగాణ స్పోర్ట్స్ పాలసీ ప్రకారం కోటీ 20 లక్షల రూపాయలు నగదు బహుమతిగా అందిస్తామని క్రీడాశాఖ మంత్రి వాకిటి శ్రీహరి చెప్పా రు. తెలంగాణ పేరును ప్రపంచ స్థాయిలో చాటిచెప్పాడంటూ కొనియాడారు. ప్రతిభ ఉన్న క్రీడాకారులకు తమ ప్రభుత్వం ఎప్పు డూ అండగా ఉంటుందని మంత్రి వాకిటి శ్రీహరి తెలిపారు.

చిన్నప్పటి నుంచే సంచలనాలు :

హైదరాబాద్‌కు చెందిన ధనుష్ శ్రీకాంత్ గత కొంతకాలంగా అంతర్జాతీయ స్థాయి పోటీల్లో అదరగొడుతున్నాడు. 14 ఏళ్ల వయసులో షూటింగ్ ప్రాక్టీస్ మొదలుపెట్టిన ధనుష్ పలు సంచలనాలు నమోదు చేశాడు. బొమ్మ తుపాకీతో షూటింగ్ చేస్తుండడం చూసి అతని తల్లిదండ్రులు ధనుష్‌ను ప్రోత్సహించారు. 2015లో ఒలింపిక్ మెడలిస్ట్ గగన్ నారంగ్ అకాడమీ గన్ ఫర్ గ్లోరీలో చేర్పించారు.

గగన్ నారంగ్ శిక్షణలో మరిం త రాటుదేలిన ఈ యువ షూటర్ వెనుదిరిగి చూసుకోలేదు.2019 తెలంగాణ షూటింగ్ చాంపియన్‌షిప్‌లో 400కు 400 పాయిం ట్లు స్కోర్ చేసి రికార్డు సృష్టించాడు.గురువు తగ్గ శిష్యుడిగా 10 మీటర్ల ఎయిర్ రైఫిల్‌లో వరుసగా పతకాలు గెలుస్తున్నాడు. ఇప్పటి వరకూ అంతర్జాతీయ స్థాయి పోటీల్లో 13 పతకాలు గెలిచాడు. 2021 డెఫ్లంఫిక్స్‌లోనూ అద్భుత ప్రదర్శన కనబరిచాడు.

10 మీటర్ల ఎయిర్ రైఫిల్ ఈవెంట్‌తో పాటు మిక్సిడ్ టీమ్ ఈవెంట్‌లోనూ స్వర్ణాలు గెలిచాడు. అప్పుడు కూడా స్కోరింగ్‌లో ప్రపంచ రికార్డులు నమోదు చేశాడు. అలాగే 2023 జూనియర్ ప్రపంచకప్ షూటింగ్ పోటీల్లోనూ బంగారు పతకం గెలిచాడు.ఖర్చుతో కూడిన షూటింగ్ క్రీడలో ఆర్థిక ఇబ్బందులు ఎదురైనా వెనకడుగు వేయకుండా తల్లిదండ్రుల ప్రోత్సాహంతో దూసుకెళుతున్నాడు.