‘మిరాయ్’ లాంటి విజయవంతమైన చిత్రం తర్వాత పీపుల్ మీడియా ఫ్యాక్టరీ సంస్థ నుంచి ఇప్పుడు ఓ మ్యూజికల్ రొమాంటిక్ ఎంటర్‌టైనర్ రాబోతోంది. అదే సిద్ధు జొన్నలగడ్డ హీరోగా నటిస్తున్న ‘తెలుసు కదా’ చిత్రం. ఇందులో శ్రీనిధిశెట్టి, రాశీఖన్నా కథానాయికలు. ప్రముఖ స్టైలిస్ట్ -ఫిల్మ్ మేకర్ నీరజా కోన దర్శకత్వంలో టీజీ విశ్వప్రసాద్, కృతి ప్రసాద్ నిర్మించిన ఈ సినిమా అక్టోబర్ 17న విడుదల కానుంది. ఈ సందర్భంగా డైరెక్టర్ నీరజ కోన విలేకరుల సమావేశంలో చిత్ర విశేషాలను పంచుకున్నారు.

కాస్ట్యూమ్ డిజైన్ నుంచి డైరెక్షన్ వైపు ఇంట్రెస్ట్ ఎలా కలిగింది?

-నాకు స్కూల్ డేస్ నుంచి రైటింగ్ ఇష్టం. పోయెట్రీలో ఒక పుస్తకం కూడా పబ్లిష్ చేశాను. కథలు చెప్పమంటే చాలా ఇష్టం. ఒక దశలో సినిమాకు కథ రాయగలననే నమ్మకం కుదిరింది. అలా రాసుకున్న కథల్లో ‘తెలుసు కదా’ ఒకటి. -నేను సినిమాలకు అసిస్టెంట్ డైరెక్టర్‌గా పనిచేయలేదు. దాదాపు వంద సినిమాలకు కాస్ట్యూమ్స్ డిజైన్ చేశాను. 12 ఏళ్లుగా ఇండస్ట్రీలో ఉన్నాను. అదే నా ఎక్స్‌పీరియన్స్, లెర్నింగ్ స్కూల్. ‘పులి ట్రైలర్ లాంచ్ ఈవెంట్‌లో నితిన్‌ను కలిసి, ఈ ఐడియా చెప్పా. సిద్దు అయితే బాగుంటుందని ఆయనే చెప్పారు. సిద్దు సింగిల్ సిట్టింగ్‌లో మొత్తం కథ విన్నారు. తర్వాత ఆయన మేనేజర్ ఫోన్ చేసి ఈ కథ చేస్తున్నామని చెప్పారు.. అది నా జీవితంలో మర్చిపోలేని మూమెంట్. రైటర్‌గా, డైరెక్టర్‌గా ‘తెలుసు కదా’ ప్రాజెక్ట్‌తో పరిచయం కావడం ఆనందంగా ఉంది.  

‘తెలుసు కదా’ ఎలా ఉండబోతుంది?

-ఇదొక లవ్‌స్టోరీ. ఇద్దరి మధ్య ఉండే ప్రేమకథ. ఒక ప్రేమకథతోపాటు ఒక కాంప్లెక్స్ సిటీ కూడా ఉంది. ఇది క్యారెక్టర్ డ్రివెన్ స్టోరీ. ఇందులో మూడు క్యారెక్టర్స్ కూడా చాలా స్ట్రాంగ్‌గా ఉంటాయి. ప్రతి క్యారెక్టర్ హానెస్ట్‌గా ఉంటుంది. ప్రతి క్యారెక్టర్ ఎమోషనల్‌గా కనెక్ట్ అవుతుంది. కథను టీజర్‌లో రివీల్ చేయలేదు. ట్రైలర్‌తో ఇది క్యారెక్టర్ డ్రివెన్ స్టొరీ అని చెప్పబోతున్నాం. 

డైరెక్టర్ మహిళ అంటే.. కథను అమ్మాయిల వైపు నుంచి చెప్తారనే వాదన ఉంటుంది.. మీరు ఎలా ఈ సినిమాను డీల్ చేశారు?

ఒక కథ అమ్మాయి రాసిందా, అబ్బాయి రాసిందా.. అనేదానికంటే బాగా రాశారు అన్నదే ఇంపార్టెంట్. నా దృష్టి కూడా కథను హానెస్ట్‌గా చెప్పడంపైనే ఉంది. ఈ కథ ఎలాంటి బయోస్ లేకుండా రాసింది. ఈ సినిమాను అబ్బాయి తీశారా.. అమ్మాయి తీశారా.. అన్నదానికంటే ఒక గుడ్ ఫిలిం మేకర్ తీసిన సినిమా అని పేరు తెచ్చుకోవడం నాకు ఇష్టం.

-సిద్దుకు ‘డీజే టిల్లు’ ఐకానిక్ క్యారెక్టర్ కదా ఆ క్యారెక్టర్ నుంచి బయటికి వచ్చి వరుణ్ క్యారెక్టర్‌ను ప్రజెంట్ చేయడానికి మీకు ఎంత ఛాలెంజింగ్‌గా అనిపించింది? 

-కెరీర్‌లో ఐకానిక్ క్యారెక్టర్ దొరకడం అనేది ఒక అదృష్టం. ఎన్ని సినిమాలు చేసినా కొందరికి ఐకానిక్ రోల్ దొరకదు. కానీ సిద్దూకు టిల్లు లాంటి అద్భుతమైన క్యారెక్టర్ కెరీర్ బిగినింగ్‌లోనే పడింది. నిజానికి అలాంటి ఇమేజ్ ఉన్నప్పుడు ఒక కొత్త క్యారెక్టర్ చేయడం ఒత్తిడితో కూడుకున్న వ్యవహారం. కానీ ఇందులో వరుణ్ క్యారెక్టర్ ఆయన చాలా యూనిక్‌గా ప్రజెంట్ చేశారు. ఒక ఫిలిం మేకర్‌గా నేను ఏమి అనుకుంటున్నానో ఆ క్యారెక్టర్‌నున వరుణ్‌గా సిద్ధులో చూశాను. సిద్దుకు యూనిక్ పర్‌స్పెక్టివ్ ఉంటుంది. తన వల్ల నా రైటింగ్ ఇంకా బెటర్ అయ్యింది. తను ఈ కథకు మరో పర్‌స్పెక్టివ్ తీసుకువచ్చారు. ఆయన అద్భుతమైన పెర్ఫార్మర్. గ్రేట్ స్టోరీ టెల్లర్. వరుణ్ క్యారెక్టర్‌లో మెస్మరైజ్ చేశారు. తన లుక్, మేనరిజం అన్నింటిపరంగా చాలా స్ట్రాంగ్ ప్రజెన్స్ క్యారెక్టర్ అవుతుంది. 

డైరెక్టర్‌గా మారుతున్నారు.. ఎలా ఫీలవుతున్నారు?   

డైరెక్టర్‌గా కావాలనుకోవడం, ఫస్ట్ సిట్టింగ్‌లోనే కథ ఓకే కావడం ఒక అదృష్టంగా భావిస్తున్నా. -కాస్ట్యూమ్ డిజైనర్‌గా ‘బాద్‌షా’ నా ఫస్ట్ ఫిలిం. అసిస్టెంట్‌గా కెరీర్ స్టార్ట్ చేశాను. ‘అత్తారింటికి దారేది’, ‘ఎవడు’, ‘రామయ్య వస్తావయ్య’ లాంటి ఎన్నో పెద్ద సినిమాలకు పనిచేశాను. తమిళ్‌లో విజయ్, కార్తీక్, సూర్య, విక్రమ్, శివ కార్తికేయన్ ఇలా అందరు పెద్ద హీరోలతో పనిచేసే అవకాశం దొరికింది. -నాకు నేర్చుకోవడం ఇష్టం. ఈ జర్నీలో ఎంతో మంది గొప్ప టెక్నిషియన్స్‌తో వర్క్ చేశాను. ఇవన్నీ నాకు నేర్చుకోవడానికి, ఫిల్మ్ మేకర్ కావడానికి ఎంతగానో సహాయపడ్డాయి. 

హీరోయిన్లు శ్రీనిధి, రాశి గురించి చెప్పండి?  

శ్రీనిధి చేసిన రాగ చాలా కాంప్లెక్స్ క్యారెక్టర్. ‘హిట్3’కి ముందే ఈ క్యారెక్టర్ చెప్పాను. తను ‘కేజీఎఫ్’, ‘హిట్3’ లాంటి సినిమాలు చేయడం మాకు చాలా హెల్ప్ అయ్యింది. అంజలి క్యారెక్టర్‌లో రాశి చాలా అద్భుతంగా నటిచింది. తనది చాలా యూనిక్ క్యారెక్టర్.

మీ కొత్త ప్రాజెక్ట్స్ గురించి..?

-ఒక హార్డ్ హిట్టింగ్ లవ్‌స్టొరీ చేయబోతున్నా. త్వరలోనే అనౌన్స్ చేయబోతున్నాం.