కూకట్‌పల్లిలోని రెస్టారెంట్‌లో అగ్నిప్రమాదం

హైదరాబాద్: కూకట్‌పల్లిలోని వివేకానంద కాలనీ(Vivekananda Colony)లోని ఒక రెస్టారెంట్ వంటగదిలో గురువారం అర్ధరాత్రి అగ్నిప్రమాదం(Fire Accident) సంభవించింది. ప్రమాదం జరిగిన సమయంలో ఎక్కువ మంది కస్టమర్లు లేకపోవడంతో ఎటువంటి ప్రాణనష్టం జరగలేదు. ఎల్‌పిజి లీకేజీ(LPG leakage) కారణంగా మంటలు చెలరేగినట్లు అనుమానిస్తున్నారు.

పోలీసులు తెలిపిన వివరాల ప్రకారం, హోటల్ సిబ్బంది వంటగది నుండి మంటలు, పొగ వెలువడుతున్నట్లు గమనించి అగ్నిమాపక శాఖ, పోలీసులకు సమాచారం అందించారు. వారు సంఘటనా స్థలానికి చేరుకుని వెంటనే వాటిని ఆర్పివేశారు. వంట ప్రాంతంలో నిల్వ చేసిన ఎల్‌పిజి సిలిండర్లను పోలీసు బృందం, హోటల్ సిబ్బంది సురక్షితమైన ప్రదేశానికి తరలించారు. దీనివల్ల పెద్ద ప్రమాదం, ప్రాణనష్టం తప్పిందని అధికారులు తెలిపారు. ఈ సంఘటనపై కూకట్‌పల్లి పోలీసులు దర్యాప్తు చేస్తున్నారు.