1. లగేజీ కష్టాలకు చెక్.. హ్యాండ్స్ ఫ్రీ గా జర్నీ చేసే ఛాన్స్ 
2. స్టేషన్లలోనే స్మార్ట్ లాకర్లు
3. తొలి విడతలో ఏడు రద్దీ స్టేషన్లలో ఏర్పాటు

హైదరాబాద్ సిటీ బ్యూరో, నవంబర్ 29 (విజయక్రాంతి) : నిత్యం వేలాది మందితో కిటకిటలాడే హైదరాబాద్ మెట్రోలో ప్రయాణించే వారికి అధికారులు శుభవార్త చెప్పారు. ఇకపై ప్రయాణంలో లగేజీ మోత మోయాల్సిన పనిలేదు. ప్రయాణికుల లగేజీ కష్టాలను తీర్చేందుకు హైదరాబాద్ మెట్రో రైల్ సంస్థ వినూత్న సౌకర్యాన్ని అందుబాటులోకి తెచ్చింది. టక్కీట్ అనే సంస్థతో కలిసి మెట్రో స్టేషన్లలో స్మార్ట్ లాకర్ వ్యవస్థను ప్రవేశపెట్టింది.

సాధారణంగా ఆఫీసులకు వెళ్లేవారు, షాపింగ్ చేసేవారు తమ వెంట హెల్మెట్లు, బ్యాగులు, ఇతర సంచులు తీసుకువెళ్తుంటారు. రద్దీ సమయాల్లో వీటిని మోస్తూ మెట్రోలో ప్రయాణించడం నరకప్రాయంగా ఉంటుంది. ఈ సమస్యకు చెక్ పెడుతూ.. ఇకపై ప్రయాణికులు తమ సామన్లను స్టేషన్లలోనే ఏర్పాటు చేసిన లాకర్లలో భద్రంగా దాచుకోవచ్చు. దీనివల్ల నగరంలో హ్యాండ్స్ ఫ్రీగా చక్కర్లు కొట్టే వెసులుబాటు కలుగుతుంది.

ఈ స్మార్ట్ లాకర్ల సేవలను తొలి విడతలో రద్దీ ఎక్కువగా ఉండే మియాపూర్,అమీర్‌పేట,పంజాగుట్ట,ఎల్బీనగర్,ఉప్పల్,పరేడ్ గ్రౌండ్స్,హైటెక్ సిటీ 7 ప్రధాన స్టేషన్లలో అందుబాటులోకి తెచ్చారు. టక్కీట్ స్మార్ట్ లాకర్ల వినియోగం చాలా సులభంగా ఉంటుందని నిర్వాహకులు తెలిపారు.

ప్రయాణికులు తమకు ఎంత సమయం పాటు లాకర్ కావాలో సెలెక్ట్ చేసుకుని, దానికి సంబంధించిన చార్జీని డిజిటల్ పేమెంట్ ద్వారా చెల్లించాలి. అనంతరం లాకర్‌ను వినియోగించుకోవచ్చు. షాపింగ్ బ్యాగులు, హెల్మెట్లు వంటివి ఇందులో సురక్షితంగా ఉంచుకోవచ్చు.ఇప్పటికే ఉప్పల్ మెట్రో స్టేషన్‌లో ఈ సేవలు ప్రారంభమైనట్లు ఎల్‌అండ్ టీ మెట్రో ఎండీ, సీఈఓ కేవీబీ రెడ్డి తెలిపారు.