స్వర్ణగిరి ఆలయ పరిసరాలలో నిర్వహణ

హైదరాబాద్, నవంబర్ 29 (విజయక్రాంతి): గ్రామ పంచాయతీ ఎన్నికల కోడ్ అమలులోకి రావడంతో ఆదివారం నిర్వహించాల్సిన కురుమల దసరా, దీపావళి సమ్మేళనాన్ని డిసెంబర్ 21వ తేదీకి వాయిదా వేస్తున్నట్లు తెలంగాణ రాష్ట్ర కురుమ సంఘం అధ్యక్షుడు, మాజీ ఎమ్మెల్సీ యెగ్గె మల్లేషం పేర్కొన్నారు. ముస్లింజంగ్ వంతెన వద్ద గల కురుమ సంఘం కార్యాలయంలో ఏర్పాటు చేసిన విలేకరుల సమావేశంలో ఆయన రాష్ట్ర నాయకులతో కలిసి మాట్లాడుతూ.. మొదట ఈ నెల 30వ తేదీన స్వర్ణగిరి శ్రీ వెంకటేశ్వర స్వామి ఆలయ పరిసరాలలో కురుమల ఏర్పాటు చేశామన్నా రు.

గ్రామ పంచాయతీ ఎన్నికల కోడ్ నేపథ్యంలో సమ్మేళనం నిర్వహించరాదని అక్కడి జిల్లా కలెక్టర్, డీసీపీతో మాట్లాడగా ఎన్నికల కోడ్ ఉన్నందున నిర్వహించరాదన్నట్లు తెలిపారు. వీటన్నింటిని దృష్టిలో ఉంచుకుని సమ్మేళనం డిసెంబర్ 21న స్వర్ణగిరి శ్రీ వెంకటేశ్వర స్వామి ఆలయ పరిసరాలలో నిర్వహించనున్నట్లు వివరించారు. సమావేశంలో రాష్ట్ర కురుమ సంఘం ప్రధాన కార్యదర్శి బండారు నారాయణ, కట్ట మల్లేషం, కొలుపుల నరసింహ, రెక్కాల కొండల్ రాజు, చిట్టెం శైలేందర్, డాక్టర్ ప్రేమ్ రాజ్, చెవ్వ శ్యాంరావు, చిందం మధుసూదన్, కె సదానందం, రాఘవేందర్ తదితరులు పాల్గొన్నారు.