భార్యను హత్య చేసిన భర్త..

హంతకుడిని పోలీసులకు అప్పగించిన స్థానికులు..

తాండూరు (విజయక్రాంతి): వికారాబాద్ జిల్లా పెద్దేముల్ గ్రామ పంచాయతీ అనుబంధ గ్రామమైన పెద్దేముల్ తండాలో దారుణం జరిగింది. స్థానికులు తెలిపిన వివరాల ప్రకారం.. తండాకు చెందిన మూడవత్ రవి, అనిత(28) భార్య భర్తలు, వీరికి 15 సంవత్సరాల క్రితం వివాహం అయింది. ఇద్దరు కూతుళ్లు, ఓ కుమారుడు ఉన్నారు. అయితే గత కొన్ని రోజుల క్రితం రవి మతిస్థిమితం కోల్పోయి ఇంటి నుండి వెళ్లిపోయాడు. ఎలాగోలా అతనిని కుటుంబ సభ్యులు తిరిగి ఇటీవలే ఇంటికి తీసుకువచ్చి చికిత్సలు చేయించారు. ఈ విషయమై ఈరోజు ఇద్దరు భార్య భర్తల మధ్య వాగ్వాదం జరిగింది. కోపోద్రిక్తుడైన రవి సలికే పారా తీసుకొని ఒక్కసారిగా భార్య అనితపై దాడి చేశాడు. దీంతో తీవ్ర గాయాలైన అనిత అక్కడికక్కడే మృతి చెందింది. స్థానికులు రవిని పోలీసులకు అప్పగించారు. ఈ మేరకు ఘటన స్థలానికి చేరుకున్న పోలీసులు కేసు నమోదు చేసి విచారణ చేస్తున్నారు.