బాలకృష్ణ, బోయపాటి శ్రీను కాంబోలో తెరకెక్కుతున్న చిత్రం ‘అఖండ2’. 14 రీల్స్ ప్లస్ బ్యానర్‌పై రామ్ ఆచంట, గోపి ఆచంట నిర్మిస్తున్న ఈ సినిమా డిసెంబర్ 5న విడుదల కానుంది. ఈ మూవీ ప్రమోషన్స్‌లో భాగంగా శనివారం నటుడు ఆది పినిశెట్టి మీడియాతో ముచ్చటించారు. ఈ సందర్భంగా ఆయన చెప్పిన ఈ సినిమా విశేషాలివీ.. 

ఇంతకుముందు బోయపాటి శ్రీను ‘సరైనోడు’లో వైరం ధనుష్ పాత్ర పోషించా. ఆ పాత్రకు ఇప్పుడు ‘అఖండ2’లో నేను చేసిన కారెక్టర్‌కు చాలా తేడా ఉంటుంది. ఈ పాత్ర నాకూ కొత్తే. అందుకే ప్రేక్షకుల స్పందన కోసం ఎదురుచూస్తున్నా. 

మంత్రతంత్రాల చుట్టూ తిరిగే పాత్రలు నేనెప్పుడూ చేయలేదు. నేను కథ వినకుండానే ఓకే చేసిన తొలిచిత్రమిదే. బోయపాటిపై నాకు నమ్మకం ఎక్కువ. కానీ, బాలయ్యకు ఎదురుగా అంటే సరిపోతానా? అని అడిగాను. పర్‌ఫెక్ట్‌గా ఉంటారని ఆయన చెప్పారు. సెట్‌కి వెళ్లిన తర్వాత బోయపాటి నా పాత్ర గురించి వివరించినప్పుడు చాలా కంగారు పడ్డా. అయితే, బోయపాటి నాకు ముందే కొన్ని రిఫరెన్సులిచ్చారు. చాలా లుక్‌టెస్టుల తర్వాత ఫైనల్‌గా ఇప్పుడు సినిమాలో ప్రేక్షకులు చూడబోయే లుక్ ఫైనల్ అయింది. 

'అఖండ’ కంటే ‘అఖండ తాండవం’లో హై మూమెంట్స్ ఎక్కువగా ఉంటాయి. యాక్షన్, మ్యూజిక్, ఎలివేషన్స్ చూస్తే పదివేల వాట్స్ కరెంట్ షాక్ కొట్టినట్టుంటుంది. అదే ‘అఖండ2’ ప్లస్ పాయింట్. 

ఇందులో భారీ యాక్షన్ సీక్వెన్సులుంటాయి. ముఖ్యంగా రెండు మేజర్ సీక్వెన్సులుంటాయి. ఓ సీక్వెన్స్‌ను ఎండాకాలంలో 15 రోజుల పాటు నిర్విరామంగా షూటింగ్ చేశాం. మధ్యాహ్నం వరకు చాలా మంది ఎండదెబ్బకు పడిపోయారు. కానీ బాలయ్య మాత్రం ఆ ఎండలోనే అలా నిల్చుండేవారు. కనీసం గొడుగు కూడా పట్టుకుని ఉండేవారు కాదు. సినిమా పట్ల ఆయనకుండే ప్రేమ నాకు అప్పుడు అర్థమైంది. 

బాలయ్య గురించి బయట చాలా వింటుంటాం. కానీ, సెట్‌లో ఆయన ఎనర్జీ వేరేలా ఉంటుంది. మ్యాచ్ చేయడం చాలా కష్టం. ఆయన ఉంటే సెట్‌లో పాజిటివ్ వైబ్స్ కనిపిస్తాయి. మా నాన్నతో పని చేసిన అనుభవాన్ని కూడా నాతో పంచుకున్నారు.  

ఇక నా మిగతా ప్రాజెక్టుల గురించి చెప్పాలంటే.. ‘థండర్’ అనే స్పోర్ట్స్ డ్రామాను తమిళ, తెలుగు భాషల్లో చేస్తున్నా. ‘మరకతమణి’ సీక్వెల్ చేస్తున్నా. కార్తీతో కలిసి ‘మార్షల్’ సినిమాలోనూ నటిస్తున్నా.