సందీప్ రాజ్ దర్శకత్వంలో రోషన్ కనకాల నటిస్తున్న చిత్రం ‘మోగ్లీ’. పీపుల్స్ మీడియా ఫ్యాక్టరీ బ్యానర్‌పై ఈ చిత్రాన్ని టీజీ విశ్వప్రసాద్, కృతిప్రసాద్ నిర్మిస్తున్నారు. డిసెంబర్ 12న విడుదల కానున్న సినిమా విశేషాలను డైరెక్టర్ సందీప్ రాజ్ మీడియాతో పంచుకున్నారు. “నాకు ముందుగా నటన అంటేనే ఇష్టం. ‘చాయ్ బిస్కెట్’లో ఉన్నప్పుడు కథలు కూడా రాసేవాడ్ని. అలా ‘అతిథి’ షార్ట్‌ఫిల్మ్ చేశా. ఆ తర్వాత దర్శకుడిగా నాకు అవకాశాలు ప్రారంభమయ్యాయి. అలా డైరెక్షన్‌పై ఫోకస్ పెట్టా. ఇటీవల సినిమాల్లో కనిపిస్తూ, నాలోని నటుడిని సంతృప్తిప రుస్తున్నా.

చెవిటి, మూగ వ్యక్తి పాత్రను పోషించడం అంత సులభం కాదు. ప్రేమకు భాష అవసరం లేదు అనే విషయాన్ని చెప్పేందుకు ఆ పాత్రను అలా తీర్చిదిద్దాను. హీరో ఎంత అమాయకుడైతే అంత స్ట్రాంగ్‌గా కనిపిస్తాడని నా అభిప్రాయం. జంగ్లీ బుక్‌లోని మోగ్లీకి, ఈ మోగ్లీకి ఎలాంటి సంబంధం ఉండదు. ప్రజెంట్ ట్రెండ్‌కి అసలు మోగ్లీ అంటే తెలీదు. నా టైటిల్స్ అందరికీ అర్థం అవ్వాలనుకుంటా. అందుకే ‘కలర్ ఫోటో’ అని సింపుల్ టైటిల్ పెట్టాం. కానీ ‘మోగ్లీ’ మాత్రం ఈ తరానికి సరిగ్గా అర్థం కావడం లేదు. ‘మోగ్లీ’ అన్నివర్గాల ప్రేక్షకులను ఆకట్టుకునేలా ఉంటుంది.

చివరకు మాత్రం ఓ బలమైన ఫిలాసఫీని చూపిస్తాను. అందులోని సందేశాన్ని ఇప్పుడే రివీల్ చేయలేను. మా సినిమాకు అదే పెద్ద ట్విస్ట్.  ఈ చిత్రంలో బండి సరోజ్ పాత్రను చూసి అంతా షాక్ అవుతారు. కొన్నేళ్లుగా తెలుగులో ఇలాంటి విలన్ పాత్రనైతే కచ్చితంగా చూసుండరు. డేట్స్ క్లాష్ అవ్వడం వల్ల ఈ సినిమాలో సంపూర్ణేశ్‌బాబు ఓ పాత్రను చేయలేకపోయారు. ‘కలర్ ఫోటో’ తర్వాత నేను స్టార్ హీరోతో సినిమా చేయాలనుకున్నా.

కానీ డేట్స్ సర్దుబాటు కావడంలేదు. అలా గత ఏడాది వరకు ఎదురుచూశా. ఈ గ్యాప్‌లోనే ‘మోగ్లీ’ కథ రాసుకున్నా. నేను అనుకున్న స్టార్‌తోనే ఆ సినిమా కచ్చితంగా చేస్తా. అది నా డ్రీమ్ ప్రాజెక్ట్. ప్రస్తుతం నటుడిగా రెండు ప్రాజెక్టులు చేస్తున్నా. డిసెంబర్ 20 నుంచి నటుడిగా బిజీ అవుతా. నాకు ఓ ఫ్యాంటసీ కథను చేయాలనుంది. ఈ సినిమా ఫలితం తర్వాత ఏ జానర్ కథ చేయాలన్నది ఆలోచిస్తా” అన్నారు.