మహాత్మ జ్యోతిబా ఫూలే జీవిత చరిత్ర ఆధారంగా నిర్మించిన సినిమా ‘ఫూలే’. జ్యోతిబా ఫూలే పాత్రలో ప్రతీక్ గాంధీ నటించగా, సావిత్రిబాయి ఫూలే పాత్రలో పాత్రలేఖ పోషించారు. ఈ చిత్రానికి అనంత నారాయణ్ మహదేవన్ దర్శకత్వం వహించారు. హిందీలో విడుదలై విశేష ప్రేక్షకాదరణ పొందిన ఈ సినిమా ఇప్పుడు తెలుగులోకి అనువాదమవుతోంది. దీన్ని పొన్నం రవిచంద్ర సుపద క్రియేషన్స్ ద్వారా తెలుగు ప్రేక్షకుల ముందుకు తీసుకొస్తున్నారు.

మహాత్మా జ్యోతిరావు ఫూలే 135వ వర్ధంతి సందర్భంగా ఈ సినిమా ట్రైలర్స్, ఆడియో ఆవిష్కరణ కార్యక్రమాన్ని హైదరాబాద్‌లో నిర్వహించారు. ఈ కార్యక్రమానికి మంత్రి పొన్నం ప్రభాకర్ ముఖ్యఅతిథిగా హాజరు కాగా, తెలంగాణ సాంస్కృతిక సారథి చైర్‌పర్సన్ వెన్నెల గద్దర్, ప్రభుత్వ సలహాదారు కే కేశవరావు తదితరులు ఈ కార్యక్రమంలో పాల్గొన్నారు. ఈ సందర్భంగా మంత్రి పొన్నం ప్రభాకర్ మాట్లాడుతూ.. “జ్యోతిరావు ఫూలే జీవిత విశేషాలతో హిందీలో తీసిన సినిమాను తెలుగులో విడుదల చేయడం అభినందనీయం. ఈ సినిమాను క్షేత్రస్థాయిలో ప్రజల్లోకి తీసుకెళ్లడానికి ప్రభుత్వం నుంచి సహ కారం అందిస్తాం” అన్నారు.

వెన్నెల గద్దర్ మాట్లాడుతూ.. “ఇలాంటి సినిమాలే ప్రజల్లో, పిల్లలో సామాజిక స్పృహను నేర్పిస్తాయి. ఈ సినిమాను స్కూళ్లు, కాలేజీల్లో ప్రదర్శించాలి” అన్నారు. చిత్ర నిర్మాత పొన్నం రవిచంద్ర మాట్లాడుతూ.. “ప్రభుత్వం నుంచి వినోద పన్ను రద్దు చేస్తే ఫూలే సినిమాను గ్రామగ్రామానికి తీసుకెళ్లవచ్చు” అన్నారు. ‘చారిత్రాత్మక సినిమా నిర్మించడం చైతన్యానికి నాందీ గీతమవుతుంద’ని ఫైనాన్స్ కమిషన్ చైర్మన్ రాజయ్య అన్నారు.

ప్రజా గాయకురాలు విమలక్క  మాట్లా డుతూ.. ‘ఫూలే ఒక గొప్ప సామాజిక ఉద్యమకారుడు. ఎంత పెద్ద సినిమాలు వచ్చినా ఫూలే సినిమా హిట్ అవుతుంది. ప్రతి స్కూల్‌లో ఈ సినిమా ప్రదర్శించాలి. ఈ సినిమాను భావి తరాలకు అందించాలనుకోవడం గొప్ప ఆశయం” అన్నారు. ‘ఫూలే సినిమాను రాష్ట్రవ్యాప్తంగా చూపించి ప్రజల్లో చైతన్యం కలిగించాల’ని బీసీ కమిషన్ చైర్మన్ నిరంజన్ అన్నారు.

జాతీయ బీసీ సంఘం నాయకుడు జాజుల శ్రీనివాస్ గౌడ్ మాట్లాడుతూ.. “సినిమాలు వ్యాపారంగా లాభసాటిగా ఉండే ఈరోజుల్లో సామాజిక బాధ్యతతో ఫూలే జీవితం ప్రజలకు తెలియాలని ఈ సినిమాను తెలుగులో తీసుకురావడం అభినందనీయం. రాష్ట్రంలోని అన్ని గ్రామాల్లో ‘బలగం’ చిత్రాన్ని చూసినట్టు ఫూలే సినిమా చూడాలి. భవిషత్ తరాలు చైతన్యం కావాలి. ఫూలే సినిమా చూస్తే యువత పెడదోవ పట్టకుండా ఉంటుంది” అన్నారు.

వీహెచ్ మాట్లాడుతూ.. “ఫూలే సినిమాను ప్రతి థియేటర్లలో చూపించాలి. తద్వారా బడుగు బలహీన వర్గా ల్లో చైతన్యం నింపవచ్చు” అని చెప్పారు. ఈ చిత్ర సంగీత దర్శకురాలు ఎంఎం శ్రీలేఖ మాట్లాడుతూ.. “నేను 80పైగా సినిమాలకు పనిచేశాను. ఫూలే సినిమా చేయడం అదృష్టంగా భావిస్తున్నా. ఈ సినిమా నేటి తరానికి స్ఫూర్తిగా నిలుస్తుంది” అన్నారు. బీసీ కమిషన్ మాజీ చైర్మన్ కృష్ణ మోహన్, సీనియర్ జర్నలిస్ట్ పాశం యాదగిరి తదితరులు పాల్గొన్నారు.