హైదరాబాద్: నిఖేశ్‌‌ కుమార్‌పై ఆదాయానికి మించిన ఆస్తుల కేసు నమోదు చేసిన అనంతరం అవినీతి నిరోధక శాఖ (ఏసీబీ) అధికారులు నిఖేశ్ కుమార్‌ను అరెస్టు చేసి ఉదయం 6 గంటలకు న్యాయమూర్తి ఎదుట హాజరుపరిచారు. దీంతో ఏసీబీ జడ్జి ఆయనకు 14 రోజుల జ్యుడీషియల్ కస్టడీ విధించారు. అనంతరం నిఖేశ్ కుమార్ ను ఏసీబీ అధికారులు చంచల్ గూడ జైలుకు తరలించారు. గండిపేట మండలం పీరంచెరువు పెబెల్ సిటీ గేటెడ్ కమ్యూనిటీలో ఉన్న నీటిపారుదల శాఖ అసిస్టెంట్ ఎగ్జిక్యూటివ్ ఇంజనీర్ నికేష్ కుమార్ నివాసంలో ఏసీబీ వరుస దాడులు నిర్వహించింది.

ఆరోపించిన అవినీతి, ఆదాయానికి మించి ఆస్తులు కూడబెట్టడంపై దర్యాప్తులో భాగంగా ఈ దాడులు జరిగాయి. మొయినాబాద్‌లో 6.5 ఎకరాల వ్యవసాయ భూమి, మూడు ఫామ్‌హౌస్‌లు, శంషాబాద్, మియాపూర్‌లో రెండు వాణిజ్య సముదాయాలు సహా నిఖేశ్‌‌ ‌కుమార్‌కు ఆస్తులు ఉన్నట్లు ఏసీబీ విచారణలో తేలింది. వీటితో పాటు ఆయన బంధువుల పేర్లపై భారీగా ఆస్తులు ఉన్నట్లు గుర్తించారు. అతని మొత్తం ఆస్తుల విలువ సుమారు రూ. 17.7 కోట్లు, మార్కెట్ విలువ దాదాపు రూ. 100 కోట్లు. మొయినాబాద్ మండలంలోని తోలుకట్ట, సజ్జనపల్లి, నక్కలపల్లిలోని ఫాంహౌస్‌లతో పాటు 19 చోట్ల ఏసీబీ తనిఖీలు నిర్వహించి అక్రమ ఆస్తులకు సంబంధించిన పత్రాలను అధికారులు స్వాధీనం చేసుకున్నారు.