తెలంగాణకి వర్ష సూచన.. నాలుగు రోజుల పాటు జోరు వానలు

హైదరాబాద్: బంగాళాఖాతంలో అల్పపీడనం కొనసాగుతోంది. ఈ నేపథ్యంలో తెలంగాణకి వర్ష సూచన ఉన్నట్లు భారత వాతావరణ శాఖ పేర్కొంది. రాష్ట్రంలో శుక్రవారం భారీ వర్షాలు కురిసే అవకాశం ఉందని తెలిపింది. సెప్టెంబరు 3 వరకు రాష్ట్రంలో చాలా చోట్ల భారీ వర్షాలు కురిసే అవకాశం ఉందని వాతావరణ శాఖ విడుదల చేసిన ఏడు రోజుల వాతావరణ బులెటిన్ సూచిస్తుంది. రేపు అల్పపీడనం బలపడి వాయుగుండంగా మారే అవకాశముంది. నేడు తేలికపాటి నుంచి మోస్తరు, రేపు భారీ వర్షాలు కురిసే అవకాశమున్నందున పలు జిల్లాలకు ఐఎండీ ఆరెంజ్ అలెర్ట్ జారీ చేసింది. శుక్రవారం ఆదిలాబాద్, కొమరంభీం ఆసిఫాబాద్, మంచిర్యాలు, జగిత్యాలలో భారీ నుంచి అతి భారీ వర్షాలు కురిసే అవకాశం ఉందని, నిర్మల్, నిజామాబాద్, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు,  భద్రాద్రి కొత్తగూడెం, ఖమ్మం, మహబూబాబాద్, వరంగల్, హన్మకొండ, హైదరాబాద్, మేడ్చల్ మల్కాజిగిరి జిల్లాల్లో భారీ వర్షాలు కురిసే అవకాశం ఉందని వాతావరణ కేంద్రం తెలిపింది.