మాల్యాల,(విజయక్రాంతి): జగిత్యాల జిల్లా కొండగట్టులో భారీ అగ్ని ప్రమాదం జరిగింది. ఈ అగ్నిప్రమాదం దాదాపు 30 బొమ్మల షాపులు దగ్ధం అయ్యాయి. వివరాల్లోకి వెళితే... కొండగట్టు గుట్ట కింద షార్ట్ సర్క్యూట్ తో ఒక్కసారిగా ఉవ్వెత్తున మంటలు ఎగిసిపడాయి. 30కి పైగా బొమ్మల షాపులు మంటల్లో పూర్తిగా దగ్ధమయ్యాయి. కోటి రూపాయలకు పైగా ఆస్తి నష్టం జరిగినట్లు అధికారులు అంచనా వేస్తున్నారు. కొండగట్టులో అర్ధరాత్రి జరిగిన భారీ అగ్నిప్రమాదంపై మంత్రి పొన్నం ప్రభాకర్ తీవ్ర విచారం వ్యక్తం చేశారు.

ఘటనపై జగిత్యాల జిల్లా కలెక్టర్ తో మంత్రి పొన్నం ప్రభాకర్ ఫోన్ లో మాట్లాడి వివరాలు తెలుసుకున్నారు. ప్రమాదం జరిగిన ప్రాంతంలో పర్యటించాలని ఆదేశించారు. రోడ్డుపై ఉన్న బొమ్మల దుకాణాలలో అగ్ని ప్రమాదం సంభవించిందని, అగ్ని ప్రమాదం అర్ధరాతి జరగడం వల్ల ప్రాణాపాయం తప్పిందని, షాపులు దగ్ధం అవడం వల్ల ఆస్తి నష్టం జరిగినట్టు అధికారులు మంత్రి దృష్టికి తీసుకొచ్చారు. బాధితులకు ప్రభుత్వం అండగా ఉంటుందని మంత్రి పొన్నం హామీ ఇచ్చారు.

జగిత్యాల జిల్లా కొండగట్టు స్టేజీ సమీపంలో అగ్ని ప్రమాదం వల్ల పలు షాపులు దగ్దమవడంపై కేంద్ర మంత్రి బండి సంజయ్ ఆరా తీశారు. జగిత్యాల జిల్లా కలెక్టర్ తో ఫోన్ లో మాట్లాడారు. సమాచారం తెలిసిన వెంటనే ఫైర్ సిబ్బంది వెళ్లి మంటలను అదుపులోకి తీసుకొచ్చినట్లు కలెక్టర్ వెల్లడించారు. ఇలాంటి ఘటనలు పునరావ్రుతం కాకుండా తగిన చర్యలు తీసుకోవాలని సూచించిన బండి సంజయ్.