మరింత దిగిన బంగారం

తులం ధర మరో రూ.980 తగ్గుదల

హైదరాబాద్, డిసెంబర్ 14: ప్రపంచ మార్కెట్లో వరుస రెండు రోజుల్లో పుత్తడి ధర పతనంకావడంతో  హైదరాబాద్ బులియన్ మార్కెట్లో శనివారం మరింత తగ్గింది. అంతర్జాతీయ మార్కెట్లో బంగారం ఫ్యూచర్ ధర గురువారం 40 డాలర్లు, శుక్రవారం రాత్రి మరో 30 డాలర్లు పడిపోయింది దీనితో హైదరాబాద్‌లో 24 క్యారెట్ల బంగారం ధర మరో రూ.980 క్షీణించి రూ. 77,980 వద్ద ముగిసింది.

ఇది రెండు రోజుల్లో రూ.1,580 తగ్గింది. తాజాగా 22 క్యారెట్ల ఆభరణాల బంగారం 10 గ్రాముల ధర మరో రూ.900 దిగి రూ.71,400 వద్ద నిలిచింది. యూఎస్ ఆర్థిక గణాంకాలు మిశ్రమంగా వెలువడినందున, బంగారం ఫ్యూచర్లలో లాభాల స్వీకరణ జరగడంతో ధర క్షీణించిందని ఎల్‌కేపీ సెక్యూరిటీస్ వైస్ ప్రెసిడెంట్ జతిన్ త్రివేది తెలిపారు. 

మరో రూ.1,000 తగ్గిన వెండి

బంగారం బాటలోనే మరో విలువైన లోహం వెండి ధర సైతం క్షీణించింది. శుక్రవారం రూ.3,000 తగ్గిన కేజీ వెండి ధర శనివారం మరో రూ.1,000 తగ్గి రూ.1,00,000 వద్ద నిలిచింది.