అమరావతి: భారీ వర్షాల కారణంగా తెలుగు ప్రజలు శ్రీలంక కొలంబో ఎయిర్‌పోర్టులో చిక్కుకున్నారు.  తమను భారత్ కు తీసుకురావాలంటూ ఆంధ్రప్రదేశ్ ప్రభుత్వానికి వారు విజ్ఞప్తి చేశారు.  తెనాలి, హైదరాబాద్, గుంటూరు, విజయవాడ, విశాఖపట్నం నుంచి 25 మంది తెలుగు ప్రజలు ఏడు రోజుల పర్యటన నిమిత్తం శ్రీలంక వెళ్లారు. మూడు రోజుల క్రితం బయలుదేరిన వీరు, చెన్నైకి రావాల్సిన విమానం తూపాను దృష్ట్యా రద్దు చేశారని,  దీంతో శ్రీలంక నుంచి భారత్ రాలేక ఎయిర్‌పోర్టులోనే ఇబ్బందులు ఎదుర్కుంటున్నట్లు పర్యటకులు ఏపీ ఉపముఖ్యమంత్రి పవన్ కళ్యాణ్,  ఏపీ మంత్రి నారా లోకేష్ కు తెలిపారు.

తక్షణమే స్పందించి, తమను సురక్షితంగా స్వదేశానికి చేర్చాలని వారు రాష్ట్ర ప్రభుత్వాన్ని వేడుకున్నారు. తెలుగు ప్రజల విజ్ఞప్తిపై నారా లోకేష్ స్పందించారు. కొలంబోలో చిక్కుకున్న తెలుగు పర్యటకులను ఏపీకి రప్పించేందుకు మంది చర్యలు తీసుకున్నట్లు సమాచారం. కొలంబో,చెన్నై అధికారులతో తక్షణ సమన్వయం చేయాలని, చిక్కుకున్న ప్రయాణికులకు అవసరమైన సహాయాన్ని అందించాలని ఆయన అధికారులను ఆదేశించారు. ప్రయాణికులు సురక్షితంగా, త్వరితగతిన స్వదేశానికి తీసుకురావాలని లోకేష్ అధికారులకు సూచించారు.