న్యూఢిల్లీ: కేంద్ర బడ్జెట్ 2024-25పై చర్చించేందుకు ప్రధానమంత్రి నరేంద్ర మోడీ గురువారం ప్రముఖ ఆర్థికవేత్తలతో సమావేశం కానున్నారు. న్యూఢిల్లీలో జరిగే సమావేశంలో పరిశ్రమ నిపుణులు, ఆర్థికవేత్తలు, నీతి ఆయోగ్ వైస్ చైర్మన్ సుమన్ బెరీ ఆర్థిక వ్యూహాలపై ప్రధాని చర్చించనున్నారు. కేంద్రంలో మూడోసారి అధికారంలోకి వచ్చిన మోడీ నేతృత్వంలోని ప్రభుత్వానికి ఇదే తొలి బడ్జెట్‌. జూలై 23న పార్లమెంట్‌లో ఆర్థిక మంత్రి నిర్మలా సీతారామన్ బడ్జెట్‌ను సమర్పించనున్నారు. బడ్జెట్ సమావేశాలు జూలై 22న ప్రారంభమై ఆగస్టు 12న ముగుస్తాయి.

రష్యా, ఆస్ట్రియాలో దేశాల పర్యటన ముగించుకుని ప్రధాని మోడీ గురువారం ఉదయం దేశ రాజధానికి తిరిగి వచ్చారు. గత నెలలో పార్లమెంటు ఉభయ సభలను ఉద్దేశించి ప్రసంగిస్తూ, ప్రెసిడెంట్ ద్రౌపది ముర్ము కేంద్ర ప్రభుత్వం సంస్కరణల వేగవంతం చేయడానికి చారిత్రాత్మక చర్యలతో ముందుకు వస్తుందని సూచించారు. ఆర్థిక మంత్రి నిర్మలా సీతారామన్ రాబోయే బడ్జెట్‌పై ఆర్థికవేత్తలు, పరిశ్రమల కెప్టెన్లతో చర్చలు జరిపారు.