ముంబైలో ముందస్తు రుతుపవన జల్లులు

ముంబై: జూన్ నెలలో రుతుపవనాల వర్షాలు ముంబైని తాకాయి. ఆదివారం ఉదయం ముంబైలో రుతుపవన పూర్వ వర్షాలు విస్తృతంగా కురిశాయి. గత కొద్ది రోజులుగా నగరాన్ని ఉక్కిరిబిక్కిరి చేసిన ఎండలు, ఉక్కపోత నుండి ప్రజలకు ఉపశమనాన్ని కల్పించాయి. ముంబైలోని ఐలాండ్ సిటీ, పశ్చిమ, తూర్పు శివారు ప్రాంతాలతో సహా పలు భాగాల్లో మోస్తరు నుండి భారీ వర్షాలు కురిశాయి. కొన్ని ప్రాంతాల్లో నీరు నిలిచిపోయినట్లు సమాచారం. పొరుగున ఉన్న నవీ ముంబైలోని కొన్ని ప్రాంతాల్లో కూడా భారీ వర్షాలు కురిశాయి.

దాదర్, మతుంగ, ఖార్, చెంబూర్, మంఖుర్ద్, కుర్లా, శాంతాక్రూజ్, విలే పార్లే, అంధేరి, వెర్సోవా ఉపనగరాల్లో ఒకటి, రెండు గంటల వ్యవధిలో వర్షపాతం నమోదైంది. వర్షం కారణంగా కొన్ని ప్రాంతాల్లో నీరు నిలిచిపోవడం వల్ల సియోన్-పన్వెల్ హైవేలోని వాషి వైపు వెళ్లే రహదారిపై భారీ ట్రాఫిక్ జామ్ కావడంతో వాహనదారులకు, ప్రయాణికులకు అసౌకర్యం కలిగింది. పలువురు ద్విచక్ర వాహనదారులు ఫ్లైఓవర్లు, స్కైవాక్‌లు, దుకాణాల షెడ్ల కింద ఆశ్రయం పొందుతూ కనిపించారు.