క్రీడా మైదానంలో ఉత్సాహపు పరుగులు!

* పాపన్నపేటలో ఘనంగా ఎస్‌జీఎఫ్‌ క్రీడలు ప్రారంభం

* మూడు రోజులపాటు క్రీడాసంబరం..

* విజయమే లక్ష్యంగా విద్యార్థుల పోటాపోటీ

పాపన్నపేట: క్రీడా మైదానం కేరింతలతో మార్మోగింది.. విద్యార్థుల ఉత్సాహం హద్దులు దాటింది.. విజయం కోసం జట్లు వ్యూహాలు రచిస్తుంటే.. తమ జట్టు గెలవాలంటూ తోటి విద్యార్థులు హర్షధ్వానాలు చేశారు. పాపన్నపేట మండల కేంద్రంలోని ప్రభుత్వ ఉన్నత పాఠశాల(Government High School) ప్రాంగణం మంగళవారం ఉదయం క్రీడా సందడితో కళకళలాడింది. మూడు రోజులపాటు నిర్వహించనున్న ఎస్‌జీఎఫ్‌ క్రీడా పోటీలు(SGF Sports Competitions) ఘనంగా ప్రారంభమయ్యాయి.

క్రీడాకారులు క్రీడా దుస్తుల్లో మైదానంలోకి అడుగుపెట్టడంతో పాఠశాల ప్రాంగణంలో ప్రత్యేక వాతావరణం నెలకొంది. ఒకవైపు కబడ్డీ క్రీడాకారులు జట్లుగా విడిపోయి వ్యూహాలు సిద్ధం చేసుకుంటుండగా.. మరోవైపు కోకో, వాలీబాల్‌ పోటీలకు మైదానాలు సిద్ధమయ్యాయి. పోటీలు ప్రారంభంకావడంతో క్రీడాకారుల అరుపులు, తోటి విద్యార్థుల కేరింతలు మైదానాన్ని హోరెత్తించాయి.

స్థానిక ఎస్‌ఐ శ్రీనివాస్‌ గౌడ్‌ క్రీడా పోటీలను లాంఛనంగా ప్రారంభించారు. క్రీడాకారులను పరిచయం చేసుకుని వారితో కరచాలనం చేస్తూ ఉత్సాహపరిచారు. క్రీడల్లో గెలుపు ఒక్కటే ముఖ్యం కాదని.. క్రమశిక్షణ, పట్టుదల, క్రీడాస్ఫూర్తి మరింత ముఖ్యమని సూచించారు. ఓటమి నుంచి పాఠం నేర్చుకుని ముందుకు సాగాలని విద్యార్థులకు పిలుపు నిచ్చారు. ఈ కార్యక్రమంలో స్థానిక సర్పంచ్‌ పావని నరేందర్‌ గౌడ్‌, తహసీల్దార్‌ సతీష్‌, ఎంపీడీవో విష్ణువర్ధన్, మండల విద్యాధికారి ప్రతాప్‌రెడ్డి పాల్గొని క్రీడాకారులను అభినందించారు.