ప్రిన్సిపాల్ దురుసు ప్రవర్తనపై విద్యార్థి నాయకుడి ఆగ్రహం

​భిక్కనూరు, ఆగస్టు 20: భిక్కనూరు మండలంలోని సోషల్ వెల్ఫేర్ రెసిడెన్షియల్ పాఠశాలలో వసతుల లోపాలను పరిశీలించడానికి వెళ్లిన తనతో ఇంచార్జ్ ప్రిన్సిపాల్ వెంకటేశ్వర్లు దురుసుగా ప్రవర్తించారని విద్యార్థి నాయకుడు తుడుం ప్రదీప్ తెలిపారు. ​పాఠశాలలో అధ్వానంగా మారిన మరుగుదొడ్లు, భోజనశాలలో అపరిశుభ్రత, పగిలిపోయిన వాటర్ ట్యాంక్ వంటి సమస్యలపై తాను ప్రిన్సిపాల్‌ను ప్రశ్నించినట్లు ప్రదీప్ వెల్లడించారు.

ఇదే సమయంలో రెండు రోజులు గైర్హాజరైన ఓ విద్యార్థి నుంచి రూ.200 ఫైన్ వసూలు చేసి, ఆ డబ్బుతో గోడకు పెయింట్ వేయిస్తామని చెప్పడాన్ని తాను నిలదీశానని తెలిపారు. దీంతో ప్రిన్సిపాల్ నువ్వెవరు? ఏం చేసుకుంటావో చేసుకో అంటూ తనపై బాధ్యతారహితంగా, దురుసుగా ప్రవర్తించారని ప్రదీప్ ఆగ్రహం వ్యక్తం చేశారు. ​పాఠశాలలో నిబంధనలకు విరుద్ధంగా ఫైన్ల పేరుతో డబ్బులు వసూలు చేయడంపై మరియు మౌలిక వసతుల కల్పనలో నిర్లక్ష్యం వహిస్తున్న వారిపై ఉన్నతాధికారులు తక్షణమే స్పందించి సమగ్ర విచారణ జరిపించాలని ఆయన డిమాండ్ చేశారు.