టెక్సాస్: అమెరికాలోని టెక్సాస్ భారీగా వరదలు(Texas Flooding) పోటెత్తాయి. గ్యాడలూప్ నది ఉప్పొంగి 13 మంది మృతి చెందారు. వేసవి శిక్షణ శిభిరాల్లో ఉన్న20 మంది పిల్లలు గల్లంతయ్యారు. శాన్ ఆంటోనియా(San Antonio), కెర్ విల్లే, శాన్ ఏంజెల్ లో భారీగా వర్షం కురిసింది. గత వందేళ్లలో ఇదే అతిపెద్ద వర్షపాతమని అధికారులు వెల్లడించారు. వరదల కారణంగా జడ్జి రాబ్ కెల్లీ కౌంటీలోనూ పలువురు గల్లంతయ్యారు. గల్లంతైన వారి ఆచూకీ కోసం వరద నీటిలో శోధన బృందాలు పడవ,హెలికాప్టర్ రెస్క్యూలను నిర్వహించాయి. సెంట్రల్ కెర్ కౌంటీలో రాత్రిపూట కనీసం 25 సెంటీమీటర్లు వర్షం కురిసింది. దీని వలన గ్వాడాలుపే నదికి ఆకస్మిక వరదలు వచ్చాయని అధికారులు చెబుతున్నారు.

పరిస్థితి ఇంకా ఉగ్రరూపం దాల్చుతుందని, మృతుల సంఖ్య పెరగవచ్చని సమాచారం. తప్పిపోయిన వారి కోసం సహాయక చర్యలు కొనసాగుతున్నాయి. లెఫ్టినెంట్ గవర్నర్ డాన్ పాట్రిక్ ఇప్పటివరకు ఆరు నుండి 10 మృతదేహాలను కనుగొన్నట్లు చెప్పారు. అదే సమయంలో, కెర్ కౌంటీ షెరీఫ్ లారీ లీతా వరదల్లో 13 మంది మరణించారని నివేదించారు. మృతుల్లో కొందరు పెద్దలు, కొందరు పిల్లలున్నారని పాట్రిక్ ఒక వార్తా సమావేశంలో అన్నారు. కెర్ కౌంటీలో ప్రధాన ఎన్నికైన అధికారి జడ్జి రాబ్ కెల్లీ మాట్లాడుతూ... మరణించిన వారిని గుర్తించడానికి అధికారులు ప్రయత్నం చేస్తున్నారని చెప్పారు. 

కెర్ కౌంటీ షెరీఫ్ కార్యాలయ ఫేస్‌బుక్ పేజీలో, ప్రజలు తమ ప్రియమైన వారిని కనుగొనడంలో సహాయం కోసం వేడుకున్నారు. వారి చిత్రాలను సోషల్ మీడియాలో పోస్ట్ చేశారు. కనీసం 400 మంది సహాయక చర్యల్లో పాల్గొంటున్నారని పాట్రిక్ చెప్పారు. శోధనలో తొమ్మిది రెస్క్యూ బృందాలు, 14 హెలికాప్టర్లు,12 డ్రోన్‌లను ఉపయోగిస్తున్నారు. కొంతమందిని చెట్ల నుండి కాపాడుతున్నారని పాట్రిక్ చెప్పారు. క్యాంప్ మిస్టిక్‌కు హాజరవుతున్న దాదాపు 750 మంది బాలికలలో దాదాపు 23 మంది శుక్రవారం ఆచూకీ తెలియని వారిలో ఉన్నారని పాట్రిక్ చెప్పారు.