వైట్‌వాష్ పరాభవానికి ప్రతీకారం తీర్చుకునే క్రమంలో భారత్ తొలి అడుగు సక్సెస్‌ఫుల్‌గా పడింది. బ్యాటింగ్‌లో విరాట్ కోహ్లీ శతకానికి తోడు , రోహిత్ శర్మ మెరుపులు, కెఎల్ రాహుల్ కెప్టెన్ ఇన్నినింగ్స్ తోడవడంతో 349 పరుగుల భారీస్కోర్ చేసింది. సౌతాఫ్రికా ఆరంభంలోనే వికెట్లు కోల్పోయినా అంత సులభంగా ఓటమిని అంగీకరించలేదు. టెయిలెండర్లు పోరాడడంతో మ్యాచ్‌ను చివరి ఓవర్ వరకూ తీసుకెళ్లింది. చివర్లో భారత బౌలర్లు కాస్త పట్టుదల కనబరచడంతో అతికష్టంమ్మీద విజయాన్ని అందుకుంది. ఓవరాల్‌గా కోహ్లీ రికార్డ్ సెంచరీ రాంఛీ వన్డేలో హైలెట్‌గా నిలిచింది.

-తొలి వన్డేలో భారత్ విజయం 

-శతక్కొట్టిన విరాట్ కోహ్లీ 

-రాహుల్, రోహిత్ హాఫ్ సెంచరీలు

-ఛేజింగ్‌లో పోరాడి ఓడిన సౌతాఫ్రికా

రాంఛీ, నవంబర్ 30 : సౌతాఫ్రికాతో వన్డే సిరీస్‌లో భారత్ శుభారంభం చేసింది. భారీస్కోర్లు నమోదైన మ్యాచ్‌లో పరుగుల తేడాతో విజయం సాధించింది. టాస్ గెలిచిన సఫారీలు బ్యాటింగ్ ఎంచుకోగా.. భారత తుది జట్టు మార్పులు జరిగాయి. పంత్‌తో పాటు నితీశ్ కుమార్ రెడ్డికి సైతం చోటు దక్కలేదు.

నాలుగో ప్లేస్‌లో రుతురాజ్ గైక్వాడ్‌కు టీమిండియా మేనేజ్‌మెంట్ అవకాశమిచ్చింది. గిల్ లేకపోవడంతో ఓపెనర్‌గా వచ్చిన జైస్వాల్ అవకాశాన్ని సద్వినియోగం చేసుకోలేకపోయాడు. సిక్సర్ కొట్టి ఊపుమీద కనిపించినప్పటకీ త్వరగానే ఔటయ్యాడు. తర్వాత రోకో జోడీ సఫారీ బౌలర్లను ఆటాడుకుంది. ఒకవైపు కోహ్లీ, మరోవైపు రోహిత్ శర్మ భారీ షాట్లతో చెలరేగిపోయారు. పవర్ ప్లే ముగిసిన తర్వాత కూడా దూకుడుగా ఆడుతూ అదరగొట్టారు. ఈ క్రమంలో ఇద్దరూ హాఫ్ సెంచరీలు పూర్తిగా చేసుకోగా.. రోహిత్ శర్మ 57 రన్స్‌కు ఔటయ్యాడు.

రోహిత్ జోడీ రెండో వికెట్‌కు 136 పరుగుల భాగస్వామ్యం నెలకొల్పింది. తర్వాత రుతురాజ్ గైక్వాడ్(8), వాషింగ్టన్ సుందర్(13) త్వరగానే ఔటయ్యారు. ఈ దశలో కేఎల్ రాహుల్‌తో కలిసి కోహ్లీ కీలక పార్టనర్‌షిప్ సాధించాడు. ఈ క్రమంలో 103 బంతుల్లో శతకం పూర్తి చేసుకున్నాడు. వన్డే కెరీర్‌లో అతనికిది 52వ సెంచరీ. అలాగే అంతర్జాతీయ కెరీర్‌లో 83వ సెంచరీ. దీంతో వన్డేల్లో అత్యధిక సెంచరీల సచిన్ రికార్డును బ్రేక్ చేశాడు. కోహ్లీ 135 (120 బంతుల్లో 11 ఫోర్లు,7 సిక్సర్లు) పరుగులకు ఔటవగా.. రాహుల్ (60) కెప్టెన్ ఇన్నింగ్స్ ఆడాడు. చివర్లో జడేజా (32) కూడా రాణించడంతో భారత్ 50 ఓవర్లలో 8 వికెట్లకు 349 పరుగులు చేసింది.

ఛేజింగ్‌లో సౌతాఫ్రికాను భారత బౌలర్లు ఆరంభంలోనే దెబ్బకొట్టారు. అర్షదీప్ సింగ్, హర్షిత్ రాణా సఫారీ టాపార్డర్ బ్యాటర్లను త్వరగానే పెవిలియన్‌కు పంపించారు.రికెల్టన్(0), డికాక్(0) డకౌటవగా.. మార్క్ క్రమ్(7) కూడా వెనుదిరిగాడు. సౌతాఫ్రికా 77 పరుగులకే 4 వికెట్లు కోల్పోవడంతో మ్యాచ్ త్వరగానే ముగిసేలా కనిపించింది. అయితే బ్రీక్జే(72), మార్క్ యెన్సన్ (70)పోరాటం మ్యాచ్‌ను ఆసక్తికరంగా మార్చింది. వీరిద్దరూ కీలక భాగస్వామ్యం నెలకొల్పగా భారత్‌కు టెన్షన్ మొదలైంది.  బ్రీక్జే, మార్క్ యెన్సన్ ఆరో వికెట్‌కు 97 పరుగులు జోడించగా.. కుల్దీప్ యాదవ్ వెంటవెంటనే ఔట్ చేసి భారత్‌కు రిలీఫ్ ఇచ్చాడు.

అయితే మిగిలిన టెయిలెండర్లు కూడా పోరాడడంతో మ్యాచ్ చివరి వరకూ వెళ్ళింది. ముఖ్యంగా బోస్చ్ భారత బౌలర్లకు చుక్కలు చూపించాడు. భారీ సిక్సర్లతో విరుచుకుపడ్డాడు. అతనికి సుబ్రియన్(17),బర్గర్(17) సపోర్ట్ చేయడంతో సౌతాఫ్రికా సంచలనం సృష్టించేలా కనిపించింది. చివరి ఓవర్లో విజయం కోసం 19 పరుగులు చేయాల్సి ఉండగా.. ప్రసిద్ధ కృష్ణ  బోస్చ్(51 బంతుల్లో 67) ను ఔట్ చేయడంతో సౌతాఫ్రికా ఇన్నింగ్స్‌కు 332 పరుగుల దగ్గర తెరపడింది. భారత బౌలర్లలో కుల్దీప్ యాదవ్ 4, హర్షిత్ రాణా 3 , అర్షదీప్ 1 వికెట్ తీశారు. ఈ విజయంతో మూడు వన్డేల సిరీస్‌లో భారత్ 1 ఆధిక్యంలో నిలిచింది. రెండో వన్డే బుధవారం రాయ్‌పూర్‌లో జరుగుతుంది.