ఎన్నో ఏళ్లుగా చేస్తున్న ప్రయత్నాలు ఫలించి భారీ విజయాన్ని అందుకుంటే సుదీర్ఘ ప్రయాణంలో ఎదుర్కొన్న ఒడిదొడుకులన్నీ ఇట్టే మర్చిపోయే సగటు మనుషులెందరో! అలాంటి విజయాన్నే ఎంజాయ్ చేస్తున్నారు నటుడు విజయ్ భాస్కర్. ఆయన తాజాగా ‘ఏనుగుతొండం ఘటికాచలం’ రూపంలో కమర్షియల్ హిట్ అందుకున్నారు. ఈ చిత్రంలో విజయ్ భాస్కర్ తొలిసారిగా కామెడియన్‌గా కనిపించారు. ఇప్పటివరకు చేసిన హీరో, విలన్, సపోర్టింగ్ క్యారెక్టర్స్ కన్నా ఈ సినిమాలో విజయ్ భాస్కర్ పండించిన కామెడీ పాత్రకు ప్రేక్షకాదరణ దక్కింది. ఈ సందర్భంగా పలు ఆసక్తికర విషయాలు పంచుకున్నారు విజయ్ భాస్కర్.  

కథానాయకుడిగా, ప్రతినాయకుడిగా, సహాయ నటుడిగా అన్ని రకాల పాత్రలు చేస్తూ టాలీవుడ్‌లో నాకంటూ ప్రత్యేక స్థానాన్ని సంపాదించుకున్నాను. ఇండస్ట్రీలో ఏ బ్యాక్‌గ్రౌండ్ లేకపోయినా ప్రతి ఒక్కరితో స్నేహ పూర్వకంగా ఉంటూ అవకాశాలు దక్కించుకుంటూ 25 ఏళ్లుగా విజయవంతమైన ప్రయాణాన్ని సాగిస్తున్నారు. 16 టీన్స్, జాబిల్లి, మనసుతో, బతు కమ్మ, నిన్నే కోరుకుంటా, శ్రీధర్మవ్యాధుడి చరిత్ర ఇలా కొన్ని సినిమాల్లో హీరోగా చేశాను. శతమానం భవతి, ఉల్లాసంగా ఉత్సహంగా, వసంతం, గోలీమార్ , మిరపకాయ్, సారొచ్చారు, రఫ్ పలు సినిమాల్లో సపోర్టింగ్ క్యారెక్టర్స్, విలన్‌గా కూడా చేశాను. 

భోజ్‌పురి భాషలో 20 సినిమాలు.. 

భోజ్‌పురి భాషలో 20 సినిమాలు చేశాను. భోజ్‌పురిలో నాతో కలసి నటించిన మనోజ్ తివారి, దినేశ్‌లాల్ యాదవ్ వంటి హీరోలు పార్లమెంట్ సభ్యులుగా ఎదిగారు. ఇవన్నిటికన్నా ‘ఏనుగుతొండం ఘటికాచలం’ సినిమాలో పూర్తిస్థాయి కామెడీ రోల్ చెయ్యడం నా జీవితంలో మరో టర్నింగ్ పాయింట్ అనుకుంటున్నా. ఈ సినిమాలో నా కెరీర్‌లో ఫస్ట్‌టైమ్ కామెడీ పాత్రలో నటించాను. డైరెక్టర్ రవిబాబు నాతో కామెడీ చేయించారు. చాలా బాగా వచ్చింది. ఈ సినిమా చూసిన వారందరూ ప్రసంశిస్తున్నారు. నిజంగా నన్ను నేను కామెడీ క్యారెక్టర్‌లో చూసుకున్నప్పుడు ఎంతో థ్రిల్లింగ్‌గా అనిపించింది. 

‘ఏనుగుతొండం టికాచలం’లో... 

అల్లరి రవిబాబు దర్శకత్వంలో తెరకెక్కిన తాజాచిత్రం ‘ఏనుగుతొండం ఘటికాచలం’ ప్రస్తుతం ఈ సినిమా ఓటీటీ ప్లాట్‌ఫాం ఈటీవీ విన్‌లో స్ట్రీమింగ్ అవుతోంది. అయితే, నా తొలిచిత్రం ‘16 టీన్స్’ ఈటీవీ సంస్థలో వచ్చింది. నా మొదటి ఓటీటీ చిత్రం ‘ఏనుగుతొండం ఘటికాచలం’. ఈ సినిమాను కూడా ఈటీవీ విన్ తీసుకో వడం యాదృచికం. ఇది నాకు చాలా సంతోషాన్నిచ్చింది. ఈ సినిమాలో దర్శకుడు రవిబాబు నాకు మంచి కామెడీ రోల్ ఇచ్చారు. గెటప్ కూడా చాలా వెరైటీగా ఉంటుంది. పాత్ర ఏదైనా నటనకు ఆస్కారం ఉంటే చాలనుకుంటాను. మంచి పాత్ర అయితే పారితోషికాల గురించి కూడా పెద్దగా పట్టించుకోను.